Minn Cristian Muscat
Kif bdiet l-imħabba tiegħek lejn il-futbol?
L-imħabba tiegħi lejn il-futbol bdiet għax kont insegwi ħafna lil missieri, Martin, meta kien jilgħab ma’ Santa Lucia FC, u dejjem kelli x-xewqa li nilgħab dan l-isport.
Iddeskrivi l-esperjenza passata tiegħek ma’ Hibernians FC bl-unuri kollha li rbaħt magħhom.
Hibernians FC hija l-familja adottiva tiegħi mill-ewwel ġurnata li ffirmajt bħala plejer kien hemm sens ta’ appartenenza kbir determinazjoni miż-żewġ naħat biex nikbru flimkien u nemmen li dawk id-disa’ snin bħala plejer kienu snin fejn tajt dak kollu li stajt biex ngħin il-klabb u l-klabb għamel l-istess fil-konfront tiegħi.
U dik mat-tim nazzjonali Malti.
It-tim nazzjonali kienet avventura sabiħa ta’ 16-il sena bid-diffikultajiet kollha tagħha imma żgur li kien ta’ unur nirrapreżenta lil pajjiżi għal 103 darbiet. Kelli l- fortuna li ħafna kowċis tawni fiduċja allura kont konsistenti f’dak li bdejt nagħmel.
Preżentement, int il-head coach tal-akkademja ta’ Hibernians FC. Iddeskrivi din l- esperjenza.
L-avventura tiegħi fil-kowċing bdiet seba’ snin ilu meta bdejt mill-U9s ta’ Hibernians u ta’ dan dejjem nirringrazzja lill-head coach ta’ dak iż-żmien Darren Casha li tani fiduċja li nibda minn x’imkien. Maż-żmien il-passjoni tal-kowċing dejjem ħarġet iktar biex meta wasalt għall-aħħar sena tiegħi bħala plejer il- president wera xewqa li nieħu taħt idejja din l-akkademja u nerġgħu nitfawha fejn tassew jistħoqqilha. Nemmen li wara sentejn ta’ xogħol siewi u strateġija ċara l-akkademja tal-Hibs jekk mhux l-aħjar akademja hija waħda mill-aqwa tnejn fil-pajjiż tagħna. Huwa xogħol kumplikat ħafna għax il-kulturá tagħna fl-isport hi dik li hi, imma huwa parti mix-xogħol tagħna li nedukaw u ngħallmu, imma l-iktar importanti ngħidu kemm lill-ġenituri u kemm lit-tfal il-veritá fuq il-futbol.
Kemm hu differenti r-rwol ta’ kowċ minn dak ta’ plejer?
Ir-rwol huwa kompletament differenti … meta tkun plejer taħseb biss fik innifsek, il-ġurnata li tilħaq kowċ trid taħseb fit-tfal kollha li jkollok u d-dinamika ta’ tim sħiħ. Jiena għandi l-fortuna li mexxejt l-istess tim għal dawn l-aħħar sitt staġuni allura kemm it-tfal kif ukoll il-ġenituri jafu kif naħdem. Hemm affarijiet li jridu dejjem ikunu hemm bħal rispett, dedikazjoni u sagrifiċċju, il-bqija tal-affarijiet jiġu waħedhom. Waħda mill-ikbar diffikultajiet hija dik li teduka l-ġenituri u ġġiegħlhom jifhmu li t-tfal jekk mhux ħa jkunu f’livell ta’ kompetizzjoni, il-livell tagħhom qatt mhu ħa jmur ‘il quddiem.
Kemm hu importanti l-iżvilupp taż-żgħażagħ (‘youth development’) anke għall- plejers futuri tat-tim nazzjonali Malti?
Għall-klabb tagħna hija waħda mill-pilastri tal-istrateġija. Il-Hibs dejjem kien dak il-klabb li jagħmel spazju għat-talent lokali dejjem jekk dak l- individwu juri li għandu l-livell biex jagħmilha fl-ogħla diviżjoni lokali. Id- differenza bejna u xi wħud mill-akkademiji l-oħra hija dik … mod tagħti l- opportunitá lil tifel jigħlab ġoċ-Challenge League jew saħansitra Amateur League u mod iddaħħlu jilgħab mal-Hibs ġol-Malta Premier fejn trid tikkompeti dejjem biex minn tal-inqas tiġi mal-ewwel tlieta. Illum nafu li l-parametri fl-izvilupp tat-tfal inbidlu. Jekk irridu nwassluhom fl-ogħla livell lokali u għaliex le anke dak ta’ barra minn xtutna, illum it-tfal jekk ma jiġux ‘streamed’ minn ta’ etá żgħira u magħżula fuq parametri li aħna stabilixxejna bħala klabb ħa tkun diffiċli ħafna biex jagħmluha Premier Division għax ir-rikjesti fiżiċi, mentali u tekniċi bl- influss tal-plejers barranin għolew ħafna.
Kif tqis il-livell tal-futbol Malti fil-preżent, u kif rajtu jinbidel tul is-snin?
Il-livell tal-moviment (futbol) lokali qiegħed jikber kemm fis-settur tal-grassroots kif ukoll f’dak tal-Premier. Nemmen li xorta waħda għad iridu jsiru xi riformi biex nimmassimizzaw ir-riżorsi li għandna. Bħalma semmejt qabel il-Malta Premier inbidel ħafna fejn ġie iktar fiżiku imma l-futbol fl- Ewropa kollha miexi lejn dik id-direzzjoni. Irridu jew ma rridux aħna bħala Akkademija għandna d-dmir u l-obliggu li nadegwaw ma’ dak li qed jiġi mitlub mill-futbol modern kemm mil-lat fiżiku imma anke dak tekniku u tattiku.
U dak tar-riżorsi (grawnds) fejn titħarrġu u tilagħbu l-logħob tagħkom?
L-infrastruttura ġo Malta kienet dejjem waħda min-nuqqasijiet tagħna, naf li saru investimenti kbar u għadhom qed isiru imma għadna lura ħafna. Aħna bħala Hibs għandna l-fortuna li għandna l-infrastruttura meħtieġa biex il-klabb tagħna f’kull ambitu jista’ jagħmel it-taħriġ tiegħu. Minn grawnds sa gym, uffiċini u dak kollu li hemm bżonn. Nemmen li b’iktar għaqal u inizjattivi mill-istakeholders kollha l-infrastruttura tista’ tkun aħjar imma l-iktar ħaġa importanti huwa li meta jsir xi tip ta’ investiment ikun hemm il-manutenzjoni ‘in place’. Inkella nerggħu nispiċċaw bi grawnds li m’għandhomx il-livell mistħoqq.
Kif qed tħares lejn il-futur tiegħek fil-futbol?
Jiena qatt ma nimponi xejn fil-ħajja professjonali tiegħi. Għadni kowċ żgħir imma b’ambizzjoni kbira. Issa qiegħed niżvolġi l-aħħar lezzjonijiet tal-liċenzja UEFA PRO li biha nkun nista’ nkun kowċ fl-ogħla livelli u nemmen li ħa tiftaħli ħafna opportunitajiet ġodda. Kelli l-fortuna li flimkien mal-plejers u l-‘coaching staff’ tiegħi nirbħu żewġ kampjonati ta’ taħt il-15-il sena, dak tas-sena l-oħra ta’ Sezzjoni B fejn lgħabna bi tfal kolla sena iżgħar, u dak ta’ din is-sena ta’ Sezzjoni A fejn nemmen li kien kampjanat inkredibbli, mhux għax biss irbaħna 14-il logħba u ġejna draw waħda biss, imma li rajna tim bi prinċipji ta’ logħba moderna kemm fil-fażi difensiva kif ukoll f’dik offensiva u dan juruh in-numri għax skurjajna 60 gowl u qlajna sebgħa biss, u s’issa qegħdin 16-il punt fuq tat-tieni post.
Nemmen li għad għandi ħafna x’nitgħallem imma x-xewqa tiegħi hija dik li nkun kowċ tal-Hibs fil-Malta Premier, maż-żmien nerġa’ mmur barra minn Malta u sa fl-aħħar inkun kowċ tat-tim nazzjonali Malti. Nemmen li t-triq hija twila imma bil-ħidma u s-sagrifiċċju u xi naqa fortuna, nemmen li nasal!
Għaddi messaġġ finali lil min jixtieq jagħmel karriera ta’ suċċess fil-futbol.
Nemmen li kull tifel u tifla meta tibda dan l-isport l-għan tagħha jkun li tirnexxi u li tkun ta’ suċċess. Wieħed irid jara s-suċċess xi jfisser għalih … f’etá żgħira, is-suċċess jitkejjel bl-iżvilupp. Sabiħ ħafna li tirbaħ imma huwa ferm iktar importanti li t-tfal jitgħallmu l-affarijiet kif suppost. Meta wieħed jasal għall-kampjonati nazzjonali ta’ taħt il-15, 17 u 19-il sena, is- suċċess jibda jitkejel iktar bir-riżultati għax it-tfal nibdew ngħallmuhom il- fażi ta’ riżultat kemm sa fl-aħħar meta jagħlqu 16-il sena jkunu eleġibbli biex jilagħbu mal-iskwadra tal-kbar. Dan il-proċess jirrikjedi paċenzja, reżiljenza, sagrifiċċju u determinazjoni kbira. Jekk wieħed ma jagħmilx dawn l-affarijiet ġurnata wara ġurnata huwa improbabbli ħafna li jasal biex ikollu karriera f’dan l-isport. Nemmen li hawn ħafna tfal li għandhom potenzjal biex jaslu, dejjem jekk ikunu indirizzati fit-triq it-tajba!