Luke Littler ta’ 17-il sena kiser rekord fil-logħob tad-darts meta għeleb b’mod imponenti lil Michael van Gerwen 7-3 biex sar l-iżgħar rebbieħ tal-Kampjonat Dinji tal-PDC World Darts Championship fl-istorja.
Iż-żagħżugħ minn Warrington kien f’forma straordinarja hekk kif fetaħ b’vantaġġ ta’ 4-0 fuq l-isfidant tiegħu. Għalkemm Van Gerwen irnexxielu jirbaħ tliet settijiet, qatt ma kien daqstant ta’ theddida għal Littler, li konsistentament żamm kontroll totali fuq il-logħba.
Van Gerwen, li kien l-iżgħar champion tal-PDC fl-2014 meta rebaħ l-ewwel wieħed mit-tliet titli tiegħu fl-età ta’ 24 sena, ra r-rekord tiegħu jinkiser b’mod faċli hekk kif Littler ddominah kompletament fl-Alexandra Palace fit-Tramuntana ta’ Londra.
Littler, f’dimostrazzjoni ta’ talent straordinarju, kellu medja ta’ 102 u tefa’ 12-il 180 sabiex mhux biss rebaħ it-trofew prestiġjuż ta’ Sid Waddell iżda wkoll il-premju ta’ £500,000.
Bil-mod kif tratta l-pressjoni li kellu bħala favorit u l-maturità li wera, tliet ġimgħat qabel jagħlaq it-18-il sena, jidher ċar li dan it-titlu mhux se jkun l-aħħar wieħed għalih.
