Mhux faċli tkun waħdek f’pajjiż barrani jew f’żona remota, karatterizzata minn ammont ma jaqta’ xejn ta’ persuni li qed jaħarbu minn pajjiżhom. Anzjani, nisa, ommijiet u tfal. Kollha bi stejjer differenti. Kollha qed jaslulhom aħbarijiet kontinwi. Min jisma’ li d-dar li kien fiha intlaqtet mill-bumbadamenti. Min jisma’ li xi nies li jaf inqatlu fl-attakki. Oħrajn jistennew aħbarijiet dwar qraba tagħhom. Din hi s-sitwazzjoni ta’ refuġjati Ukreni.
Refuġjati li marru mal-fruntieri ta’ pajjiżi ġirien tal-Ukrajna. Din hi s-sitwazzjoni li jiltaqa’ magħha ta’ kuljum Carlos Chircop, żagħżugħ Malti li mar waħdu fil-Polonja biex jgħin ir-refuġjati Ukreni. Carlos ilu xahar jgħin lil dawn ir-refuġjati. Fl-ewwel ftit jiem tiegħu hu kien għen fl-istazzjon tal-ferrovija u proprju fl-aħħar jiem hu ttrasferixxa ruħu lejn villaġġ qrib il-belt ta’ Krakow fil-Polonja fejn hemm kamp tar-refuġjati.
Talk.mt tkellmet ma’ Carlos fl-aħħar jiem. Hu jgħidilna li “issa mort ġo villaġġ żgħir ngħix mar-refuġjati. Is-sitwazzjoni tiegħi inbidlet ħafna, meta tqabbilha mal-ewwel jiem li kont hawn. Hawnhekk issa qed noqgħod mat-tfal żgħar, li jkunu qed jivvjaġġaw ma’ ommijiet. Qed nieħdu ħsiebhom u naraw xi bżonnijiet ikollhom bżonn. Qed nieħdu ukoll ħsieb li nies oħra li jiġu billi inqassmulhom l-affarijiet bħal ikel, ħwejjeġ u affarijiet bażiċi oħra”.
Xi wħud jagħżlu li jibqgħu hawn… oħrajn jimxu lejn post ieħor
Carlos jgħidilna li “dawn ir-refuġjati qed ikun hemm minnhom i jagħżlu li jibqgħu fil-villaġġ waqt li jkun hemm oħrajn li jagħżlu li jimxu lejn post ieħor. Bħala ikel normalment ikollhom, għalkemm f’dan iċ-ċentru fejn jien qiegħed jaslu donazzjonijiet minn madwar id-dinja. Biżżejjed ngħidlek li ftit ilu waslet għajnuna minn Franza. Ir-refuġjati ġeneralment jimxu meta jlestu d-dokumenti tagħhom biex b’hekk ikunu jistgħu jkomplu mexjin għal postijiet oħra fosthom bliet kbar”.
It-tfal qed ipinġu dak li raw b’għajnejhom… parti mix-xogħol tiegħi hu li nilgħab magħhom
Nitkellmu miegħu dwar is-sitwazzjoni li jkunu jinsabu fiha it-tfal Ukreni hekk kif jaslu f’dan iċ-ċentri u fil-jiem li huma jqattgħu huma. Jenfasizza li “tfal iħossuhom care free meta jaslu hawn. Jien parti minn xogħli hu li noqgħod nilgħab magħhom bil-ġugarelli, rota, futbol u anke ‘snowball fights’. Huma f’ħin li jkollhom għal kwiet anke jispiċċaw ipinġu dak li raw quddiem għajnejhom fl-Ukrajna.”
Jgħidilna li nuqqas li qed jinħass ħafna f’dawn iċ-ċentri tar-refuġjati hu nuqqas ta’ provvisti ta’ ċertu affarijiet bħal deodorants, shower gel, shampoo u sapun tal-ħasil tal-idejn. Jisħaq li “min irid jgħin jista’ jgħaddi donazzjonijiet lill-Caritas fi Krakow. Ikun jaqbel li jgħaddu donazzjonijiet lilhom milli jintbagħtu provvisti għax l-ispiża tat-trasport biex tinġarr l-għajnuna hi għolja.”
Persuna urietni ritratti ta’ suldati maqtulin b’partijiet ta’ ġisimhom neqsin
Carlos jitkellem dwar l-istejjer tar-refuġjati Ukreni. Jispjega li “jgħidulek li kellhom iħallu kollox inkluż lill-irġiel tagħhom biex huma jippruvaw jgħixu. Jien rajt ritratti li wrieni persuna fejn suldati kienu maqtulin b’partijiet neqsin jew separati, nies maħruqa kompletament, mejtin b’wiċċ ta’ dmija”, jirrakkonta Carlos.
