Hawn ġurnalisti Maltin li kieku flok laptop, komputer, jew keyboard ieħor, kellhom vleġeħ, naf lejn min jisparawhom. U ma jieqfu qatt. L-anqas jekk ikun hemm l-iċken ħaġa li ma tagħmel l-ebda differenza fil-ħajja tal-Maltin u anke tal-qarrejja, iridu jġibuha f’kull tip ta’ ġurnal.
Naħseb tafu għal min qed ngħid fejn jisparaw il-vleġeġ bil-velenu. Id-dinja żgħira u n-nies magħrufa. Aħseb u ara kemm hi żgħira Malta
Mela Joseph Muscat mar għall-marċ ta’ San Gejatanu l-Ħamrun. Għala mar ma jinteressanix. Affari tiegħu u tal-familja tiegħu. Imma mal-ewwel qamu fil-vleġeġ mgħaddsa fil-velenu ħalli jisparaw fuqu.
U se ngħidilkom! Joseph ħaqqu! Tort tiegħu!
Min jaf kemm kien hemm nies oħra li marru għall-marċ u m’għandhomx x’jaqsmu mal-Ħamrun, imma dawk ma jiġux fil-ġurnali. Ma jagħmlux aħbar. Issa Joseph Muscat irid jagħti sodisfazzjon għala kien mar marċ.
Darba niftakar kont tlajt San Ġużepp tar-Rabat, fejn kelli u għad għandi ħbieb. Kont fil-kunvent tal-Patrijiet ta’ Ġieżu hemm, u anke ħbieb għandi fil-każin ta’ l’Isle Adam. Mort il-festa filgħodu, memorji sbieħ għalija, għax jien ma niċħad xejn mill-imgħoddi tiegħi. Dejjem sibt is-sabiħ.
Mela malajr ġew tnejn jew tlieta, separati minn xulxin, u mhux f’daqqa, jistaqsuni jekk kontx ħiereġ kandidat għar-Rabat! Kurżità tal-ħbieb, imma bl-ebda ħsieb kattiv. Ma kenux beħsiebhom jagħmiu l-ebda kapital fuq il-ġurnali. Dak inhar jien ħliftha li ma mmurx aktar marċi.
Imma fuq Joseph Muscat fil-ġurnata tal-lum hemm bżonn li wiehed jibni l-istejjer, għax ma jistax ikun li l-mexxej li għamel il-Partit Nazzjonalista frak, spiċċaw jiġġieldu bejniethom, ħadd ma jafda lil ħadd, iħalluhielu lixxa! Dak l-akbar dnub li għamel.
Jafu wkoll li l-ispinta li ta lill-Partit Laburista għadha għaddejja, għax mir-raħal ċkejken ta’ Burmarrad biddel il-mentalità ta’ bosta nies.
Fi ftit kliem dawwarha żugraga. U jafu u jifhmu li bħal meta jkun hemm min qed idawwar żugraga, jagħti l-ispinta, u ż-żugraga tibqa’ għaddejja, anke meta jkun warrab minn ħdejha min ikun taha l-ewwel tidwira.
Dan kienx biżżejjed. Meta tħajjar fuq tal-football, kien hemm ukoll min tfantas, għax Joseph Muscat huwa Joseph Muscat, u allura dejjem ħaqqu s-swat.
U nerġa’ ngħid li ħaqqu Joseph Muscat! Ħtija tiegħu!
U issa se ngħidilkom għaliex.
Meta kien Prim Ministru kien biddel il-liġi tal-istampa. Tkellem mal-ġurnalisti u min imexxihom, u tneħħew ħafna responsabilitajiet jew konsegwenzi minn fuq il-ġurnalisti. Ħarġet il-Media and Defamation Act.
Barra li d-difamazzjoni tneħħiet minn reat, anke meta wieħed jingurjak gravament, bil-kliem jew bil-kitba (fejn imbagħad isir il-libell) il-libell kriminali tneħħa u anke r-responsabbilità tad-danni saret ċuċata. Ejja ma nitkellmux fuq libertà tal-istampa, għax il-libertà tal-istampa trid tosserva wkoll id-drittijiet ta’ ħaddieħor, ngħidu aħna l-privatezza ta’ dak jew dik li tkun. Illum f’€5000 massimu ta’ danni, dak li jkun jista’ jgħid li jrid u jikteb li jrid.
Jaqbillek toqgħod kwiet f’rokna u tinsa. U tittama li n-nies jinsew ukoll inġurji li jkunu sarulek. Il-pajjiżi demokratiċi tal-Ewropa għandhom liġijiet iebsin fuq l-inġurja bl-istampa fosthom il-Ġermanja u l-Italja. Il-Finlandja, il-Lussemburgu eċċ eċċ eċċ. Mhux se noqgħod ngħabbikom imma rajt rapport tal-IPI tas-sena l-oħra fejn iġib ukoll kemm hemm pajjiżi li jagħtu protezzjoni speċjali lir-reputazzjoni tal-politiċi, u dan anke dwar proċeduri.
Aħna ġejna fost xi 5 pajjiżi verġni, imma l-maġġoranza, dawk li jiddettaw x’għandna nagħmlu u kemm aħna ħżiena, żammew il-liġijiet li kellhom. Tiftakruh lil Peter Omzigt ? Mill-Olanda. Araw l-liġi tagħhom fil-qosor :
“defamation constitutes a criminal act under Title XVI (Defamation) Articles 261 upto 271 of the Dutch Penal Code. Moreover, it is a criminal act to insult the King, spouse of the King, his presumptive heirs or the Regent, and shall be punishable with imprisonment ranging from four to five years.”
U aħna hawnhekk il-ġurnali joffendu lill-President tar-Repubblika, u kull ma jista’ jagħmel xi dikjarazzjoni jew press release!
Joseph, il-klieb li fraht bihom, u anke rabbejt, u tajthom li riedu, daru biex jigdmulek idejk.
