L-opinjonista ta’ Sky Sports u ex player leġġendarju ta’ Liverpool, Jamie Carragher, jemmen li Chelsea jeħtieġ li jżommu l-manager attwali tagħhom, Thomas Tuchel.
Minħabba ċ-ċirkostanzi attwali tal-Blues, kien hemm spekulazzjoni li l-Ġermaniż jista’ jispiċċa jħalli l-club, minkejja li huwa insista li m’għandu l-ebda pjan biex jitlaq minn Stamford Bridge.
Il-futur ta’ Chelsea għadu mhux magħruf bħalissa minħabba restrizzjonijiet finanzjarji wara li l-Gvern Ingliż issanzjona lil Roman Abramovich, bil-club mill-Premier League issa qed ifittex sid ġdid.
“Naħseb li bħalissa huwa ta’ importanza vitali għal Chelsea. Huwa manager brillanti, dan nafu mir-rekord tiegħu, iżda l-mod kif mexxa lilu nnifsu fl-aħħar ftit ġimgħat verament wera x’tip ta’ raġel hu u mhux biss il-kwalitajiet tiegħu bħala manager tal-football,” qal Carragher.
Minn meta ħa t-tmexxija ta’ Chelsea f’nofs l-istaġun li għadda wara t-tkeċċija ta’ Frank Lampard, Tuchel rebaħ iċ-Champions League, is-Super Cup, u t-Tazza tad-Dinja tal-Clubs, filwaqt li mexxa wkoll lill-club għal żewġ finali domestiċi.
