Raġel ta’ 44 sena residenti ż-Żejtun ammetta quddiem il-Maġistrat Tanya Sammut li fil-pussess tiegħu kellu 12-il pjanta tal-kannabis.
Il-Prosekuzzjoni qalet fil-Qorti li dawn instabu meta marru fir-residenza tiegħu wara rapport li kien ħebb għas-sieħba.
Fil-Qorti ġie spjegat li l-imputat hekk kif ħebb għas-sieħba gidmilha subgħajha.
Hekk kif il-Pulizija waslu fir-residenza sabu li d-dar kienet kollha mkissra kif ukoll sabu 12-il pjanta tal-kannabis u anke bottijiet tal-ħġieg mimlija bil-ħaxix tal-kannabis.
Ftit tal-ħin wara li l-imputat ġie arrestat qal lill-Pulizija li ried itemm ħajtu u għalhekk ittieħed l-Isptar Monte Carmeli.
Jirriżulta li l-argument mas-sieħba qam wara li hija rrifjutat li tiffirma prokura.
Huwa ngħata sentejn ħabs sospiżi għal erba’ snin flimkien ma’ ordni ta’ trazzin u ta’ trattament għal tliet snin. Ma’ dan ġie mmultat €2,000 u ordnat iħallas €1,500 li jrid iħallashom fi żmien ta’ disa’ xhur.