Sudaniż ta’ 22 sena ntbagħat seba’ xhur ħabs wara li wieġeb ħati li pprova jaħrab minn Malta lejn l-Italja fuq bastiment.
Yusuf Yahya Mustafa ammetta li fl-14 ta’ April ta’ din is-sena, għall-ħabta tal-4.30 p.m. tela’ fuq il-bastiment fil-Marsa u staħba fih.
Minn dak li ħareġ fil-Qorti, jirriżulta li l-ekwipaġġ kien induna bir-raġel hekk kif il-vapur kien diġà telaq minn Malta u kien fi triqtu lejn l-Italja u nżamm fuqu sakemm wasal lura nhar it-Tnejn li għadda u ġie arrestat.
Id-Difiża qalet li l-imputat ikkopera mal-pulizija u li l-għan tiegħu kien biss li jkollu futur aħjar. Qalet ukoll li huwa għandu fedina penali nadifa.
Min-naħa tagħha, il-Prosekuzzjoni informat ukoll lill-Qorti li ma’ Mustafa kien hemm persuna oħra li kellha l-ħsieb li taħrab miegħu iżda fl-aħħar ħinijiet beża’ u ddeċieda li jibqa’ Malta.
Mustafa wieġeb ħati wkoll li naqas milli jagħti informazzjoni lill-Uffiċjal Prinċipali tal-Immigrazzjoni u pprova jaħrab minn Malta mingħajr il-kunsens tas-sid tal-kaptan tal-vapur.
Il-Qorti, preseduta mill-Maġistrat Victor Axiak, sabitu ħati u kkundannatu piena ta’ seba’ xhur priġunerija.
Il-Prosekuzzjoni tmexxiet mill-Ispettur Hubert Gerada. L-Avukat Martin Fenech deher għar-raġel.
