Raġel ta’ 57 sena minn Bormla baqa’ jinżamm taħt arrest preventiv wara li ammetta li seraq tliet muturi. Huwa tressaq fil-Qorti mixli li wettaq dan ir-reat fil-lejl ta’ bejn l-20 u l-21 ta’ Awwissu.
Fil-Qorti nstema’ kif l-ewwel serqa, li dehret ukoll fuq filmati tas-CCTV, seħħet f’Ħaż-Żabbar u kien sid il-mutur stess li sabu fi Triq Dom Mintoff, Bormla.
Minn investigazzjoni tal-pulizija fil-post instab mutur ieħor, li dakinhar ukoll kien insteraq minn Gwardamanġa. Il-pulizija kien irnexxielha ssib ukoll it-tielet mutur misruq, din id-darba minn Tal-Pietà.
L-imputat, Christopher Zammit, kien mixli wkoll li kiser il-kundizzjonijiet tal-ħelsien mill-arrest imposti fuqu fl-2023.
Huwa wieġeb ħati għall-akkużi u talab biex jintbagħat programm ta’ rijabilitazzjoni mill-vizzju tad-droga.
Il-Qorti laqgħet it-talba tad-difiża biex jitħejja pre-sentencing report, bis-sentenza se tingħata fis-6 t’Ottubru.