Żagħżugħ ta’ 24 sena tpoġġa taħt probation għal żmien tliet snin wara li ammetta li ta fastidju lis-sieħba tiegħu, li minnha għandu tifel, u li kkaġunalha biża’ li se tintuża vjolenza kontriha.
Il-każ seħħ nhar it-Tnejn li għadda fl-Imsida. Huwa kien mixli wkoll li heddidha u għamel użu mhux xieraq ta’ apparat ta’ komunikazzjoni elettronika.
Il-Qorti, preseduta mill-Maġistrat Caroline Farrugia Frendo, semgħet kif it-theddid fil-konfront tal-vittma kien wieħed kontinwu u kien qed isir permezz ta’ messaġġi.
Wara li semgħet lill-imputat jammetti l-akkużi miġjuba kontrih, il-Qorti poġġietu taħt ordni ta’ probation kif ukoll taħt ordni ta’ trażżin għal żmien tliet snin.
Il-Prosekuzzjoni f’dan il-każ tmexxiet mill-Ispettur Joanna Piscopo mentri ż-żagħżugħ kellu jassistih lill-Avukat Edward Gatt. L-Avukati Lennox Vella u Jean Paul Sammut dehru parte civile għall-vittma.
