Smajna bir-regolamenti ġodda li wara l-btajjel tal-Għid il-Kbir, it-tfal mhux se jkollhom ħtieġa li jilbsu maskri fuq wiċċhom minħabba l-Covid. Sinjal li aħbar tajba. Kieku ma kienx hekk, mhux se tingħata ordni bħal dik.
Il-fatti juru li l-pandemija, għalkemm għadha maghna, u tidher li se tibqa’ magħna, mhux kattiva daqs kemm kienet fil-bidu. It-tilqim kellu l-effett tiegħu, u min intlaqat għaddiha ħafif. Imqar jekk intlaqat it-tieni darba.
Din mhix l-esperjenza tagħna l-Maltin biss, imma madwar id-dinja kollha. Qabel konna nkunu bbumbardjati minn kullimkien fuq l-aħbarijiet, minn Malta u minn barra. Kultant kienet qed issir ħsara mentali akbar bil-biża’ tal-Covid milli ħsara bil-marda stess.
Illum bħas-soltu, aħbar ħażina timbotta oħra ħażina ta’ qabilha. L-aktar moda llum hija l-gwerra tal-Ukrajna. Imma nistennew qabel nitkellmu ftit fuq dan.
Minkejja kollox il-maskri għandhom is-siwi tagħhom. Jien nemmen fl-użu tagħhom volontarju. Mhux kontra l-Covid biss imma anke kontra infezzjonijiet oħra tal-influwenza, irjieħ u waħda wara l-oħra li konna nlaqqtu f’dan iż-żmien tas-sena. Dak meta l-ħsara għas-saħħa tkun ġejja minn bniedem ieħor lejna.
Ngħid li l-maskra jien użajtha mhux biss minħabba l-Covid, imma kultant aktar u aktar meta ninzerta fi dħaħen li jifgawni. Ikkuppjajt lill-Ġappuniżi li spiss tarahom fl-Ewropa bil-maskra fuq wiċċhom mhux minħabba l-Covid. Minhabba t-tniġġiż tal-arja. Naħseb li nżommha miegħi l-maskra għal meta jkun hemm il-bżonn.
U ngħid li tajba wkoll meta jonfoħ ir-riħ, u taqa’ l-kesħa u aħjar tgħatti wiċċek minħabba t-tibdil fit-temperatura, mis-sħana ta’ ġewwa u toħroġ barra. Tiftakru meta konna tfal u kienu jgħattulna wiċċna b’xalla kif noħorġu mid-duttrina?
Mhux beħsiebni narmi dak li tgħallimt f’dawk l-aħħar snin bħala ta’ siwi. Għall-bidu tiddejjaq, imma meta tidra, issib li kollox għandu l-użu tajjeb tiegħu. Anke dik l-imbierka maskra tal-Covid.
Maskri oħrajn
Hemm maskri oħrajn li rajnihom jaqgħu f’dawn l-aħħar ġimgħat. Forsi l-akbar waħda kienet dik ta’ Putin. Fl-Ewropa kienu jqisuh bhala bniedem li jistgħu jitkellmu miegħu, jafdawh, u sakemm idum hu, jistgħu jserrhu rashom . Fost il-ħbieb tiegħu kellu lil Trump, u aktar qrib lejna, lil Berlusconi. Dan kien ħobża u sikkina miegħu, u kienu jqattgħu l-btajjel flimkien. Tgħidulix kif, imma nħalli f’idejkom biex tobsru.
Però mbagħad waqgħet u b’ħoss kbir il-maskra tal-Unjoni Ewropea. Ħadet il-pożizzjoni tal-Ukrajna, li m’għandhiex issofri gwerer fuq l-art tagħha. Hekk sewwa u xieraq. Imma niskanta kif anke f’okkazjoni bħal din kull pajjiż jiġbed għal xawwatu.
L-Ewropa ddeċidiet li toħroġ xi €50 miljun f’għajnuna, u l-parti l-kbira qed imorru fi prodotti mixtrija mill-Ewropa u mibgħutin l-Ukrajna. Din hija l-istess storja bħal meta kien hemm l-għajnuna għall-Iraq wara Saddam, li l-flejjes kienu jmorru fil-bwiet tal-Amerikani stess, u ċ-ċenteżmi jaslu għand l-Iraqqini.
Johnson ma qgħadx jaħsbiha wisq. L-Ukreni għandhom bżonn jagħmlu difiża tagħhom infushom, u allura bagħtihom tankijiet!
Fil-każ ta’ Malta, pajjiż newtrali u jista’ jasal biss sa għajnuna umanitarja. Dik m’għandha tonqos lil ħadd, meta jkun hemm il-bżonn.
Maskri f’Malta
Issa li għaddiet l-elezzjoni, flok jaqgħu l-maskri, nibdew naraw li se jintlibsu maskri. Ċertu nies l-anqas tibqa’ tagħrafhom. Sal-elezzjoni kienu jħarsu fuq iċ-ċint, jistennew kif se jmorru l-affarijiet. Ma kienx biss fuq liema partit se jitla’, imma wkoll liema kandidati se jitilgħu, u min se jsir Ministru, u min se jsir Segretarju Parlamentari u mhux biżżejjed. Ministru ta’ xix? Kemm ikun hemm ċaqlieq bħal dan iż-żmien, u n-nies jilbsu maskri biex jintogħġbu?
Ara ma taħsbux li f’dan iż-żmien biss. L-imgħoddi dejjem hekk għallimni. Hemm nies li jkollhom aktar minn bandiera waħda fil-bwiet.
U għandhom kapaċità kbira li jerdgħu miż-żejża tax-xellug, u miż-żejża tal-lemin, u anke minn kull żejża li jsibu. Ma jiddejqu xejn jilbsu l-maskri.
