Minn Cristian Muscat
Aldrin, ħa mmur mal-ewwel għall-punt. Bosta ħaduha bħala ħasda l-aħbar tar-riżenja tiegħek bħala president ta’ Athletics Malta, meta tant kont qed tagħmel xogħol tajjeb. X’kien dak li wassal għal din ir-riżenja?
Ħames snin ilu sibt ruħi fl-atletika bla ma kont ippjanajt, bdejt bħala Segretarju u għal dawn l-aħħar tliet snin servejt bħala president. Matul dan iż-żmien tgħallimt ħafna, kiber l-għarfien tiegħi sportive u amministrattiv, u flimkien mat-tim ħdimna biex naraw bidliet pożittivi fis-settur.
Madankollu, jasal żmien fejn tibda tinduna li t-triq li tkun fiha tkun ezawriet il-kors tagħha. Iż-żmien u ċerti sitwazzjonijiet wassluni biex nagħraf li wasal il-waqt li nagħti spazju għal kapitlu ġdid – kemm għalija personali, kif ukoll għall-atletika nnifisha. Grazzi mill-qalb lil kull min ħadem miegħi u appoġġjani f’din l-esperjenza tant sabiħa u ta’ sfida.
Kif bdiet l-imħabba tiegħek lejn il-futbol u għal Victoria Hotspurs FC.
L-imħabba tiegħi lejn il-futbol bdiet minn età żgħira ħafna – tista’ tgħid li twelidt biha. Il-futbol dejjem kien parti naturali minn ħajti, iżda l-passjoni vera ħadet forma speċjali meta ta 10snin inghaqadt ma’ Victoria Hotspurs FC. Minn dejjem kont imdawwar b’nies li jħobbu dan il-klabb, u mal-mogħdija taż-żmien sirt inħoss li jien parti intrinsika mill-istorja tiegħu.
Għalija Victoria Hotspurs FC mhux biss tim; kien u għadu familja, simbolu ta’ tradizzjoni kalcistika, identità u unur għal beltna. Kull logħba, kull rebħa, kull sfida – komplew issaħħu l-konnessjoni tiegħi mal-klabb. Illum nista’ ngħid li din l-imħabba mhijiex biss passjoni sportiva, imma wkoll impenn personali biex inkompli nagħti sehem f’dan il-vjaġġ sabiħ li ilu għaddej ġenerazzjonijiet sħaħ.
Iddeskrivi r-rwol tiegħek bħala Assistent Segretarju ta’ Victoria Hotspurs FC u Segretarju tal-Victoria Hotspurs Youth Academy.
Ir-rwol tiegħi bħala Assistent Segretarju ta’ Victoria Hotspurs FC jinvolvi taħlita ta’ responsabbiltajiet amministrattivi u organizzattivi. Inkun ta’ sapport dirett lis-Segretarju ewlieni fil-ġestjoni tal-korrispondenza uffiċjali, u il-koordinazzjoni tal-laqgħat. Barra minn hekk, nieħu sehem fl-ippjanar tal-attivitajiet u l-inizjattivi li jgħinu fit-tkabbir u s-suċċess tal-klabb fuq u barra mill-grawnd.
Min-naħa l-oħra, bħala Segretarju tal-Victoria Hotspurs Youth Academy, nirrikonoxxi r-responsabbiltà kbira li ġġib magħha dan il-kariga, peress li qed naħdem direttament mal-ġenerazzjoni li jmiss tal-plejers tagħna. Ir-rwol tiegħi jinkludi l-koordinazzjoni bejn il-ġenituri, il-kowċis u l-amministrazzjoni; kif ukoll li niżgura li l-Akkademja topera b’mod effiċjenti u konformi mal-istandards stabbiliti mil-MFA u l-MYFA
Kemm fil-klabb kif ukoll fl-akkademja, nara r-rwol tiegħi bħala ċavetta biex noħloq ambjent strutturat, professjonali u pożittiv fejn il-futbol jista’ jiffjorixxi fuq kull livell. Huwa unur u privileġġ li nagħti sehmi f’din il-ħidma li fiha nemmen bis-sħiħ.
X’taħseb li kien is-sigriet tas-suċċess għall-promozzjoni minn National Amateur League 2 għan-National Amateur League 1 bħala Champions?
Naħseb li s-suċċess tagħna biex niksbu l-promozzjoni min-National Amateur League 2 għan-National Amateur League 1 bħala Champions kien ir-riżultat ta’ taħlita ta’ fatturi ewlenin li ħadmu flimkien b’mod armonjuż. L-ewwel nett, kellna kowċ ta’ livell għoli li mhux biss għandu għarfien tekniku u tattiku, imma wkoll kapaċità kbira biex jimmotiva lill-plejers u joħroġ l-aħjar minnhom. Dan, flimkien ma’ skwadra bilanċjata – taħlita ta’ esperjenza u żgħażagħ b’talent – kien pedament importanti għas-suċċess.
L-għaqda fit-tim u bejn il-membri tal-kumitat kienet ukoll kruċjali. Kulħadd kien qed jaħdem lejn l-istess għan, b’dedikazzjoni u lealtà sħiħa lejn il-klabb. Ma nistax ma nsemmix ukoll ir-rwol ta’ President serju u b’viżjoni ċara – persuna li dejjem baqa’ kalm u determinat anke f’mumenti diffiċli.
Fl-aħħar nett, kienet hemm ġuħ kbir għas suċċess – kemm mill-plejers, kif ukoll mill-istaff tekniku u l-amministrazzjoni. Dan ir-rieda li nirbħu u ntejbu kontinwament ħolqot kultura ta’ rebħa li wasslitna biex nilħqu l-għan tagħna.
Is-suċċess ma ġiex b’kumbinazzjoni – kien frott ta’ ħidma kollettiva, impenn u għaqda vera fil-klabb.
X’tikkummenta fuq il-kowċ Oliver Spiteri u l-president Dr Anton Tabone?
Kemm il-kowċ Oliver Spiteri kif ukoll il-president Dr Anton Tabone għandhom rwol ċentrali fis-suċċess u l-istabbiltà li qed igawdi l-klabb bħalissa.
Oliver Spiteri huwa kowċ b’esperjenza vasta fil-futbol Malti, u dan jidher ċar fil-mod kif imexxi t-tim – b’kompetenza, paċenzja u viżjoni. Huwa persuna karismatika li jaf kif jinfluwenza b’mod pożittiv l-ambjent madwaru. Jirnexxilu jżomm l-armonija fl-iskwadra anke f’mumenti diffiċli, u l-abbiltajiet tiegħu ta’ komunikazzjoni jagħmluh eċċezzjonali fil-mod kif jikkomunika l-istrateġiji u l-aspettattivi tiegħu lill-plejers. Huwa veru mexxej fil-grawnd u fid-dressing room.
Min-naħa l-oħra, il-president Anton Tabone huwa figura ta’ tmexxija stabbli u b’viżjoni ċara. Huwa ffukat, kapaċi janalizza s-sitwazzjonijiet b’mod realistiku u joħroġ b’soluzzjonijiet konkreti. Barra minn hekk, għandu l-kwalità importanti li jaf jiddelega b’mod intelliġenti, filwaqt li jżomm it-tmexxija f’idejh b’kunfidenza u serenità. Dan jagħmel lil Dr Tabone mexxej rispettat li jagħti direzzjoni ċara lill-klabb.
It-taħlita ta’ kowċ b’karattru u esperjenza bħas Sur Spiteri flimkien ma’ president b’viżjoni u tmexxija soda bħal ta’ Dr. Tabone hija bla dubju waħda mir-raġunijiet ewlenin għaliex il-klabb qed jimxi ‘l quddiem b’mod tant pożittiv.
Kif tqis il-livell tan-National Amateur League 2, u dan kemm hu differenti minn dak tal- Gozo League?
Il-livell tan-National Amateur League 2 hu wieħed serju u kompetittiv, u nista’ ngħid li joffri sfida denja ħafna, mhux inqas minn dik tal-Gozo League. Iż-żewġ kampjonati għandhom il-karatteristiċi tagħhom u kull wieħed minnhom jippreżenta diffikultajiet u intensità partikolari.
Id-differenza ewlenija tinsab fir-ritmu – fil-kampjonat Malti għandek partita kważi kull ġimgħa, b’inqas spazju għall-mistrieħ jew għal taħriġ estensiv bejn logħba u oħra. Dan ifisser li l-konsistenza u l-preparazzjoni kontinwa huma kruċjali biex tim jibqa’ jikkompeti fuq livell għoli.
Min-naħa tagħna bħala Għawdxin, hemm sfida addizzjonali li ftit jitkellmu dwarha, iżda li tħalli impatt: kull darba li jkollna partita barra minn Għawdex, irridu nibdew l-ivvjaġġar madwar erba’ sigħat qabel il-logħba. Din mhix biss sfida fiżika, iżda wkoll loġistika u mentali – trid ippjanar bir-reqqa u preparazzjoni tajba biex iżżomm il-fokus u l-enerġija sal-ħin tal-partita.
Għalhekk, filwaqt li n-National Amateur League 2 hu simili għall-Gozo League f’termini ta’ livell ta’ kompetizzjoni, in-natura kontinwa tal-istaġun flimkien maċ-ċirkostanzi partikolari tagħna bħala Għawdxin jagħmlu l-esperjenza unika u teħtieġ dedikazzjoni kbira fuq kull livell.
U dak tar-riżorsi (grawnds) fejn titħarrġu u tilagħbu l-logħob uffiċjali tagħkom?
F’dak li għandu x’jaqsam mar-riżorsi u l-faċilitajiet, nistgħu ngħidu li għandna bażi soda fejn jithejja t-tim. Il-grawnd li nużaw għat-taħriġ l-Għarb, Għawdex, jipprovdi dak kollu li għandna bżonn bħala tim tal-futbol – kemm f’termini ta’ spazju, kif ukoll infrastruttura bażika biex nagħmlu sessjonijiet ta’ taħriġ effettivi u organizzati.
Meta niġu għall-partiti tagħna f’Malta, il-biċċa l-kbira tal-grawnds huma ta’ livell aċċettabbli u adegwat għall-kompetizzjonijiet. Madankollu, wieħed mill-iżvantaġġi li nħossu xi kultant huwa l-illuminazzjoni insuffiċjenti f’ċerti stadiums, li tista’ taffettwa kemm il-kwalità tal-logħba kif ukoll is-sigurtà tal-plejers, speċjalment f’logħbiet li jintlagħbu filgħaxija.
Minkejja dan, bħala tim nibqgħu naddattaw ruħna u nagħmlu l-aħjar użu mir-riżorsi disponibbli biex inkomplu ntejbu l-livell tagħna u nżommu l-istandards professjonali li nimmiraw għalihom.
Kif qed tħares lejn il-futur tiegħek fl-amministrazzjoni tal-futbol?
Issa li l-kapitlu tiegħi fl-atletika intemm, ninsab f’pożizzjoni li niddedika aktar ħin u enerġija lejn il-passjoni vera tiegħi – il-futbol. Għalkemm l-atletika kienet esperjenza għanja u ta’ tagħlim kontinwu, il-futbol dejjem kellu post speċjali f’qalbi, u għalhekk ninsab motivat ħafna biex nagħti l-aħjar tiegħi f’dan il-qasam.
It-taħriġ u l-esperjenza li akkwistajt bħala amministratur fis-snin li għaddew se jkunu ta’ għajnuna kbira biex nikkontribwixxi b’mod effettiv u responsabbli fl-amministrazzjoni tal-futbol. Nifhem sew l-importanza tal-organizzazzjoni, tal-komunikazzjoni ċara, u tal-ħidma f’tim – elementi kruċjali biex klabb jimxi ‘l quddiem b’mod sostenibbli.
Qiegħed inħares lejn il-futur b’viżjoni pożittiva u b’ ħeġġa kbira li nagħmel differenza, u ninsab determinat li din l-esperjenza fl-amministrazzjoni tal-futbol tkun waħda ta’ suċċess, kemm għalija personali kif ukoll għall-klabb li qed nirrappreżenta.
Għaddi messaġġ finali lill-partitarji numerużi ta’ Victoria Hotspurs FC.
Il-partitarji ta’ Victoria Hotspurs FC huma nies speċjali – ta’ qalb kbira u passjoni bla qies. Intom dejjem kontu parti essenzjali mill-identità u mis-suċċessi ta’ dan il-klabb, u l-appoġġ tagħkom huwa verament wieħed uniku.
Issa li l-klabb tagħna daħal f’fażi ġdida u eċċitanti tal-istorja tiegħu, ikollna bżonnkom iżjed minn qatt qabel. Nafu li l-vjaġġ mhux se jkun wieħed faċli, iżda b’kuraġġ, determinazzjoni u, fuq kollox, bil-preżenza tagħkom dejjem warajna, nistgħu naffrontaw kull sfida li tinqala’.
Ninsab konvint li l-istaġun li ġej se jkun wieħed fejn nerġgħu naraw il-passjoni tagħkom fil-grawnds – leħen wieħed, qalb waħda. Fil-mumenti sbieħ u f’dawk aktar diffiċli, l-għaqda tagħna tkun is-saħħa tagħna. Grazzi mill-qalb ta’ dak kollu li tagħtu lill-klabb – il-futur tagħna jibda bikom. Aħna l-Hotspurs!
