It-trasferimenti tal-football li jinvolvu somom ta’ flus esorbitant saru n-norma tal-ġurnata, iżda l-pijunier tas-suq tat-trasferiment, Jean-Marc Bosman, jistqarr li huwa disgustat bid-direzzjoni li ħadet il-logħba.
Bosman qal li l-flus involuti fil-football huma “assurdi għall-aħħar” – minkejja li kien il-bniedem li biddel il-format tat-trasferimenti.
Il-Belġjan ta’ 58 sena kien jilgħab bħala midfielder ma’ Standard Liege fis-snin 80 u RFC Liege fil-bidu tas-snin 90.
L-akbar kontribut tiegħu f’dan l-isport wasal meta fittex lil RFC Liege, quddiem l-FA Belġjana u l-UEFA talli żammewh milli jħalli l-club biex jingħaqad mal-club Franċiż ta’ Dunkerque minkejja li l-kuntratt tiegħu kien spiċċa. Il-club Belġjan talab somma kbira għat-trasferiment ta’ Bosman.
Huwa kellu suċċess fl-1995 meta l-Qorti Ewropea tal-Ġustizzja ddeċidiet li l-players liberi kellhom id-dritt li jiċċaqilqu ladarba kien jiskadilhom il-kuntratt tagħhom … u proprju din id-deċiżjoni bidlet kompletament il-mod kif il-players jiċċaqilqu minn club għal ieħor.
Iżda minn dak iż-żmien it-trasferimenti ma baqgħux rikonoxxibbli, bi ħlasijiet kolossali minbarra li l-players jirċievu mijiet ta’ eluf ta’ liri f’pagi fil-ġimgħa.
L-influwenza massiva tal-flus wasslet lil Bosman biex “jogħbod” il-football, u qal li s-sena l-oħra li “anke wara dawn is-snin kollha, kollox huwa dwar il-flus aktar milli l-passjoni tal-logħba”.
Din is-sena, ir-rebbieħa tal-Ballun tad- Deheb, Cristiano Ronaldo u Karim Benzema, iffirmaw għal clubs ġodda mill-Arabja Sawdija billi użaw id-”deċiżjoni Bosman” biex ingħaqdu bi trasferiment ħieles.
Dawn il-mossi mal-medda tas-snin “marrdu” lil Bosman li kkritika bl-aħrax lill-FIFA talli ppermettiet lill-pajjiżi tas-Sawdi u tal-Qatar jużaw il-ġid kbir tagħhom għal skopijiet ta’ allegati ta’ ħasil tal-isports.
Meta tkellem dwar it-Tazza tad-Dinja tal-2022 li saret fil-Qatar, Bosman qal: “Ma kienx jagħmel sens allura u għadu ma jagħmilx sens. Hemm ħafna dwar din it-Tazza tad-Dinja li huwa assurd u bla sens.
“Bir-rispett kollu lejn il-Qatar, dan il-pajjiż m’għandu assolutament l-ebda rabta mal-logħba. Juri biss li l-football għadu ddominat mill-irġiel tal-flus.
“In-nies li għażlu l-Qatar ma kinux interessati fil-football. Għaliex għażlu pajjiż biex tiġi organizzata t-Tazza tad-Dinja fejn m’hemmx drittijiet tal-bniedem?
“Xi kultant il-football huwa forza għall-ġid. Imma x’ġid għamel fil-Qatar, fejn id-drittijiet tal-bniedem u d-drittijiet LGBT għadhom fost l-agħar fid-dinja? Dan jibgħat l-agħar messaġġ.
“Kien ċar meta taw l-offerta lill-Qatar li kien hemm xi ħaġa dubjuża għaddejja, u li allegatament il-membri tal-FIFA ġew mxaħħma.
“Fl-opinjoni tiegħi għad m’hemm l-ebda indikazzjoni li l-FIFA rriformat lilha nnifisha,” temm jgħid Bosman.
