Ċittadin Amerikan li ilu xhur jinżamm arrestat ġewwa l-Arabja Sawdija issa ngħata sentenza ta’ 16-il sena ħabs. Hu kien ġie arrestat minħabba tweets li fihom ikkritika lill-gvern tal-pajjiż.
Saad Ibrahim Almadi, li għandu 72 sena u għandu wkoll ċittadinanza Sawdija, kien ġie arrestat f’Novembru li għadda meta vvjaġġa minn Florida lejn Riyadh biex iżur lill-familja tiegħu.
Kien ibnu li żvela din l-aħbar wara li għall-ewwel darba tkellem pubblikament dwar is-sitwazzjoni ta’ missieru, u dan minkejja l-pariri li ngħata mill-Istati Uniti biex ma jitkellimx. Iben Ibrahim Almadi qal li huwa ma jridx jara lil missiru jmut fil-ħabs filwaqt li żied jgħid li l-kundizzjonijiet li qiegħed jinżamm fihom missieru huma ħżiena ħafna tant li jistgħu jitqiesu tortura. L-iben temm jgħid li l-uniku evidenza li ġiet ippreżentata fil-qorti kontra missieru kienu l-14-il tweet li kiteb.
F’dawn l-imsemmija tweets Saad kien kkritika lit-tmexxija tal-Arabja Sawdija għat-tkissier ta’ partijiet antiki fil-bliet ta’ Mecca u Jaddah, wera tħassib dwar faqar fir-renju kif ukoll kien għamel referenza għall-qtil tal-ġurnalista Jamal Khashoggi.
