Illum ingħata bidu għall-akbar studju dwar il-vaċċin għal kontra l-COVID-19, fejn l-ewwel 30,000 voluntier huma ppjanati li jgħinu biex jittestjaw il-vaċċin li nħoloq mill-Gvern Amerikan. Dan hu wieħed mill-kandidati ewlenin fit-tellieqa globali biex jinstab il-vaċċin.
S’issa għad m’hemm ebda garanzija li dan il-vaċċin sperimentali u li ġie żviluppat minn Moderna Incorporation u n-National Institutes of Health se jkun effettiv.
Il-voluntiera mhux se jkunu jafu jekk humiex qegħdin jingħataw il-vaċċin jew inkella verżjoni fittizja. Wara żewġ dożi, ix-xjentisti se jsegwu liema gruppi se jerperjenzaw l-akbar ammont ta’ infezzjonijiet filwaqt li jkomplu bir-rutina ta’ kuljum, speċjalment f’żoni fejn il-virus qed jinfirex mingħajr ma jiġi ċċekkjat.
Moderna qalu li l-vaċċin sar f’Savannah, Georgia u minn hemm bdew it-testijiet għall-vaċċin.
Intant, jidher li vaċċini oħra li saru miċ-Ċina u mill-Università ta’ Oxford ukoll bdew bit-testijiet tal-istadji finali. Dawn it-testijiet qegħdin isiru fil-Brażil u f’pajjiżi oħra milqutin ħażin mill-COVID-19.
Min-naħa l-oħra, l-Amerikani jridu jagħmlu t-testijiet tagħhom u għandhom standars għoljin. Kull xahar waqt il-ħarifa, in-netwerk ta’ prevenzjoni se tagħmel studju ġdid għal vaċċin kandidat ġdid, li kull wieħed juża 30,000 voluntier ġdid.
L-istudji massivi mhumiex qegħdin isiru biss biex jittestjaw li l-vaċċin jaħdem, iżda biex jiċċekkjaw kemm hu sigur kull wieħed minnhom.
Ix-xahar id-dieħel, għandu jsir l-istudju finali fuq il-vaċċin ta’ Oxford, segwit minn pjan biex jiġi ttestjat il-kandidat ta’ Johnson & Johnson f’Settembru u dak ta’ Novavax f’Ottubru.
