Fil-Qorti f’Londra, ilbieraħ bdiet il-kawża ċivili mressqa minn tliet vittmi ta’ bomba tal-Armata Republikana Irlandiża (IRA) kontra l-eks mexxej tas-Sinn Féin Gerry Adams. Il-vittmi qed jitolbu li Adams jinżamm personalment responsabbli għad-deċiżjonijiet li jitqiegħdu karozzi bombi f’Londra u Manchester fl-1973 u l-1996.
Gerry Adams iddikjara li ma kellu l-ebda involviment “dirett jew indirett” u ripetutament ċaħad li qatt kien fl-IRA. Il-kawża ċivili li qed tinstema’ quddiem l-Imħallef Swift fil-Qrati Rjali tal-Ġstizzja, huwa previst li ddum sebat ijiem.
L-azzjoni tressqet minn John Clark, vittma tal-attakk ta’ Old Bailey fl-1973, kif ukoll minn Jonathan Ganesh u Barry Laycock, li ndarbu fl-attakki tal-1996 fid-Docklands ta’ Londra u fiċ-Ċntru Kummerċjali Arndale ta’ Manchester.
Aktar minn 200 persuna kienu ndarbu bil-bomba li tpoġġiet barra l-Old Bailey fl-1973. L-apparat splussiv kien ġie ttrasportat b’lanċa minn Belfast għal Liverpool. Din l-isplużżjoni ġiet deskritta bħala l-aktar bomba qawwija li splodiet fil-Gran Brittanja mit-Tieni Gwerra Dinjija ’l hawn.
Aktar minn 20 sena wara, żewġ persuni nqatlu, u ħafna oħrajn indarbu minn bomba tal-IRA li kienet tħalliet fi trakk fid-Docklands ta’ Londra fid-9 ta’ Frar 1996. Ftit xhur wara, bomba oħra splodiet ħdejn iċ-ċentru tax-xiri ta’ Manchester Arndale f’Ġnju 1996.
It-tim legali li jirrappreżenta lill-vittmi qal li se jippreżenta evidenza minn xhieda li jinkludu eks membri tal-IRA, kif ukoll uffiċjali tal-pulizija u suldati rtirati. L-avukati qalu wkoll li din se tkun l-ewwel darba li Adams se jiġi kontro-interrogat f’qorti Ingliża dwar l-allegat rwol ta’ tmexxija tiegħu fl-IRA.
L-azzjoni bdiet fl-2022, eżatt qabel ma l-Att dwar il-Legacy pprojbixxa talbiet ċivili ġodda relatati mal-inkwiet, għalkemm dan jinsab fil-proċess li jiġi rrevokat.