Aktar kmieni llum, erbgħa minn ħames karozzi tat-tlielaq bdew il-vjaġġ tagħhom lejn Braga fil-Portugall wara ġimgħat ta’ preparamenti.
Dawn il-karozzi ser jitwasslu f’din il-belt biex jirrappreżentaw lil Malta fir-raba’ edizzjoni tal-Hillclimb Masters bejn is-7 u l-10 ta’ Ottubru.
Il-Masters, organizzati mill-Federation Internationale de l’Automobile (FIA) jiġbru flimkien ir-rebbieħa tal-kampjonati nazzjonali rikonoxxuti mill-ASN tal-lokal u r-rebbieħa tal-kampjonat. Għal dan l-avveniment, iċ-champions jikkompetu bl-istess karozza li jużaw matul l-istaġun. Il-Hillclimb Masters huwa l-akbar avveniment annwali ta’ din id-dixxiplina.
Il-korsa hija twila 3 kilometri fil-bidu tal-famuża “Rampa da Falperra”, irreġistrata bħala post għat-tlielaq fil-Kampjonat Ewropew mill-1978. It-triq mill-periferija ta’ Braga għal Falperra hija magħrufa li hija waħda veloċi ħafna.
Il-ħames sewwieqa Maltin, membri tal-Island Car Club li se jirrappreżentaw lil Malta, huma, Keith Camilleri, iċ-champion lokali attwali tal-Hillclimb, ħuh Kurt Camilleri, Kenneth Camilleri, Matthew Zammit u Zach Zammit. Il-karozza ta’ Zach Zammit se tkun qed tivvjaġġa lejn Braga mir-Renju Unit peress li issa qed jikkompeti hemmhekk.
Jonathan Tonna ġie magħżul mill-Federazzjoni Maltija tal-Motorsport biex jakkumpanja l-ħames timijiet bħala l-captain tat-team.