Ġuvni ta’ 19-il sena ġie arrestat mill-Pulizija wara sejba ta’ 46 qartas b’sustanza suspettata kokaina u 32 qartas b’sustanza suspettata eroina waqt ronda f’San Pawl il-Baħar.
Il-Pulizija waqfet il-karozza li kien qed isuq il-ġuvni għax ma kelliex il-pjanċi tar-reġistrazzjoni mwaħħla u kellha l-ħġieġ skur ħafna. Kif marru biex ikelmuh, rawh jarmi xi ħaġa u wara tfittxija, sabu d-droga msemmija, tliet mobiles u ammont ta’ flus kontanti, fost irregolaritajiet oħra.
Illum, il-ġuvni tressaq il-Qorti b’akkużi relatati mal-każ, wieġeb mhux ħati u baqa’ jinżamm arrestat.
