Minn Cristian Muscat
Kif bdiet l-imħabba tiegħek għall-futbol?
L-imħabba tiegħi għall-futbol bdiet minn kemm ili niftakar, grazzi għal missieri. Bħal ħafna tfal fil-Costa Rica, trabbejt nilgħab fit-toroq u fl-għelieqi tal-viċinanzi tiegħi. Il-futbol malajr sar il-ħolma tiegħi, u grazzi għall-appoġġ ta’ ommi u missieri, kienet l-unika karriera li qatt stajt nimmaġina.
Kif ġejt tilgħab f’Malta mill-Costa Rica?
L-opportunità li niġi Malta ġiet grazzi għall-aġent, Tonio D’Amato. Huwa kien dak li emmen fija u għoġbu l-istil ta’ logħob tiegħi. Minn hemm, fittex klabb hawn f’Malta. Gżira fetħuli l-bibien tagħhom, u tawni l-fiduċja biex jiffirmawni u emmnu fil-mod kif nilgħab.
Iddeskrivi l-esperjenza preżenti tiegħek ma’ Gzira United FC.
Ma’ Gżira hija esperjenza mill-aqwa għalija għax tawni l-kunfidenza li kelli bżonn, u ppermettiewli nilgħab il-logħba tiegħi liberament. Il-president, Sharlon Pace, it-team manager Marlon Galea, u l-kowċ, Darren Abdilla, poġġew ħafna fidi fija, u dan ippermettieli nħossni komdu f’kull partita. Nemmen li l-għażla ta’ dan il-klabb kienet deċiżjoni tajba ħafna; jittrattawni tajjeb ħafna.
X’tikkummenta dwar l-andament tat-tim matul dan l-istaġun s’issa?
Għall-bidu, ma ksibniex ir-riżultati li ridna, imma bqajna nitilgħu ‘l fuq. Għamilna serje ta’ sitt logħbiet mingħajr ma tlifna, u dan jgħid ħafna dwar it-titjib tat-tim.
X’inhuma t-tragwardi tagħkom għal dan l-istaġun?
L-għan tiegħi kien li niġġieled għall-ogħla postijiet, imma issa l-għan tiegħi u l-għan tat-tim huwa li nispiċċaw l-ewwel fil-Bottom 6 u nipprovaw ngħinu lit-tim bil-gowls u l-assists.
X’tista’ tgħid dwar il-kowċ, Darren Abdilla?
Nemmen li l-kowċ Darren Abdilla għen lit-tim immens. L-ideat tiegħu u l-mod ta’ ħidma tiegħu wassluna biex għamilna sitt logħbiet mingħajr ma nitilfu, u naħseb li ħareġ l-aqwa verżjoni ta’ kull plejer. Għalija, l-aqwa parti hija li jippermetti lill-plejer jesprimi ruħu liberament fil-grawnd, dejjem b’responsabbiltà, naturalment, imma nifhem li kulħadd għandu l-mod tiegħu kif jilgħab, u dan iġiegħel lill-plejer iħossu aktar liberu u aktar kunfidenti.
Kif tqis il-livell attwali tal-futbol Malti?
Huwa livell tajjeb. Hemm plejers b’ħafna kwalità; huwa wkoll tip ta’ futbol b’saħħtu u fiżiku. Vera ħadt gost nilgħab hawn.
U xi tgħidli dwar ir-riżorsi (il-grawnds) fejn titħarrġu u tilagħbu l-logħob kompetittiv tagħkom?
Rigward il-faċilitajiet, naħseb li huma tajbin. Il-klabb jipprova jagħtina l-aħjar riżorsi possibbli biex noħorġu l-ogħla livell tagħna. Fir-rigward tal-istadji fejn nikkompetu, personalment dejjem nagħżel li nilagħbu fuq ħaxix naturali aktar milli sintetiku. It-Tony Bezzina Stadium huwa l-istadium favorit tiegħi biex nilgħab fih
Kif qed tara l-futur tiegħek fil-futbol?
Fir-rigward tal-futur tiegħi, il-karriera ta’ plejer tal-futbol hija dejjem inċerta u tvarja skont il-prestazzjoni. Imma nixtieq nibni karriera hawn f’Malta. Nemmen li huwa post fejn nista’ nibqa’ u nuri l-potenzjal tiegħi.
Għaddi messaġġ finali lil dawk li jixtiequ jagħmlu karriera ta’ suċċess fil-futbol.
Il-messaġġ tiegħi għal dawk li jridu jkunu plejers tal-futbol huwa li jemmnu fl-abbiltajiet tagħhom u qatt ma jaqtgħu qalbhom. Jien ġej minn post diffiċli, fejn qatt ma mmaġinajt li nasal fejn jien issa, imma l-perseveranza u t-twemmin fija nnifsi fissru li qatt ma qtajt qalbi, u dejjem imxejt id f’id ma’ Alla, għax mingħajr Alla m’aħna xejn.