Żagħżugħ ta’ 22 sena sofra ġrieħi serji wara li aktar kmieni għall-ħabta tat-3.30 a.m kien involut f’inċident tat-traffiku li seħħ fi Triq Reġjonali Santa Venera.
Minn stħarriġ illi sar irriżulta li s-sewwieq kien qiegħed isuq meta għal xi raġuni tilef il-kontroll tal-vettura Mazda Demio u baqa’ dieħel f’ħajt u struttura li kien hemm fit-triq.
Fil-post issejħu membri mid-Dipartiment tal-Protezzjoni Ċivili, ambulanza u tim mediku li assistew liż-żagħżugħ sakemm seta’ jittieħed l-isptar għall-kura meħtieġa.
Il-Maġistrat tal-Għassa Noel Bartolo ġie infurmat bil-każ u ħatar inkjesta filwaqt li l-investigazzjonijiet tal-Pulizija għadhom għaddejjin.
