Il-katina ta’ ristoranti famuża u mifruxa mad-dinja kollha tal-McDonalds ħabbret li l-prezz qares li se tħallas biex tipprotesta għall-invażjoni tar-Russja fl-Ukrajna huwa ta’ xejn inqas minn €45 miljuni fix-xahar.
Il-kumpanija ħarġet din l-istima ta’ telf fil-bejgħ hekk kif ħabbret li minkejja li għalqet temporanjament ir-ristoranti tagħha fis-super potenza, hija se tkompli tħallas il-pagi tat-62,000 impjegati tagħha fir-Russja.
McDonalds għandu 847 ristoranti fir-Russja li huma proprjetà tiegħu. Din il-katina tal-fast food kellha pressjoni kbira biex turi l-pożizzjoni tagħha dwar id-deċiżjoni ta’ Moska li tinvadi lill-Ukrajna u kien għalhekk li ftit tal-ġranet ilu ħadet il-pass li tagħlaq il-bibien tagħha fir-Russja. Uħud mill-kompetituri ewlenin tal-McDonalds, inkluż il-KFC, segwew dan il-pass.
Il-kumpanija qalet li r-ristoranti tagħha fir-Russja u fl-Ukrajna jiġġeneraw madwar 9% tad-dħul globali tagħha.
