F’ċerimonja, 25 inġinier ġdid ingħataw il-warrant tagħhom mis-Segretarju Parlamentari għax-Xogħlijiet Pubbliċi, Omar Farrugia.
Fid-diskors tal-okkażjoni, is-Segretarju Parlamentari Omar Farrugia fakkar, “Filwaqt li qegħdin hawn illum biex niċċelebraw is-suċċessi tagħkom, irridu nifhmu l-importanza tal-rwol b’saħħtu tagħkom fis-soċjetà tagħna. Intom se tikkontribwixxu b’mod attiv fil-qasam tal-infrastruttura, fis-sostenibbiltà u fl-innovazzjoni – l-għodod ewlenin li bihom il-poplu Malti u Għawdxi jkun jista’ jgawdi minn kwalità ta’ ħajja aħjar.”
Matul iċ-ċerimonja tfakkret il-memorja tal-Inġinier Robert Schembri, li tilef ħajtu traġikament aktar kmieni din is-sena.
Preżenti għall-għoti taċ-ċertifikati tal-warrant kien hemm ukoll is-Segretarju Permanenti Godwin Mifsud, iċ-Chairperson tal-Bord tal-Inġiniera Dott. Noel Camilleri, flimkien mal-membri tal-Bord tal-Inġiniera u l-President tal-Kamra tal-Inġiniera, Inġinier Malcolm Zammit.
