Mexxej prominenti tal-milizzja Palestinjana f’Gaża li jopponi lill-Ħamas, Yasser Abu Shabab, inqatel b’tir waqt li ngħad li kien qed jipprova jikkalma tilwima bejn membri tal-familja Abu Seneima. Abu Shabab kien imexxi ’l hekk imsejjaħ grupp Forzi Popolari, li għandu għexieren ta’ ġellieda u jopera fit-territorju kkontrollat minn Iżrael ħdejn il-belt tan-nofsinhar ta’ Rafah.
Il-Forzi Popolari fi stqarrija ċaħdu rapporti “qarrieqa” li qalu li Abu Shabab inqatel mill-Ħamas, wara li kienu akkużawh li kien qed jikkollabora u jikkopera ma’ Iżrael.
Stqarrija preċedenti mit-tribù Bedwin ta’ Abu Shabab, it-Tarabin, qalet li huwa kien inqatel “f’idejn ir-reżistenza”, u akkużawh li ttradixxa lill-poplu Palestinjan. Sorsi oħra qalu li l-mewt tiegħu kienet ir-riżultat ta’ ġlieda interna għall-poter.
Mingħajr ma sostniet li kienet involuti fil-qtil tiegħu, il-Ħamas qalet li d-destin li waqa fuq Abu Shabab kien “id-destin inevitabbli ta’ dawk kollha li jittradixxu lill-nieshom u lil art twelidhom u huma kuntenti li jkunu għodda f’idejn l-Iżrael.
Ir-Radju tal-Armata ta’ Iżrael ikkwota sors tas-sigurtà li qal li Abu Shabab kien miet kaġun tal-ġrieħi li ġarrab wara li ttieħed lejn l-isptar Soroka fil-belt Iżraeljana ta’ Beersheba. Iżda l-isptar ċaħad li miet waqt li kien għall-kura fl-isptar.
F’dikjarazzjoni mill-Forzi Popolari wiegħdet li se tkompli fit-triq ta’ Yasser Abu Shabab sakemm l-aħħar terrorist f’Gaza jiġi eliminat u jinbena futur sabiħ u sigur għall-palestinjani kollha li jemmnu fil-paċi.
