L-Uganda rrapportat disa’ każi oħrajn ta’ Ebola ġewwa l-kapitali Kampala biex b’hekk issa l-infezzjonijiet magħrufa f’dawn l-aħħar jumejn telgħu għal 14.
L-imxija tal-Ebola bdiet f’Settembru li għadda u din tfaċċat f’parti rurali fiċ-ċentru tal-Uganda. Din imbagħad sabet ruħha fil-belt ta’ Kamapla, li fiha hemm jabitaw iktar minn 1.6 miljun persuna.
Din is-sitwazzjoni hija waħda tat-tħassib hekk kif skont il-Ministeru tas-Saħħa u l-Għaqda Dinjija tas-Saħħa minn kemm ilha li bdiet l-imxija kien hemm madwar 90 każ ta’ infezzjoni u minn tal-inqas 44 mewt.
L-istrain tal-virus li qiegħed jiċċirkola ġewwa l-Uganda huwa dak tas-Sudan li s’issa għad m’hemmx tilqima għalih għall-kuntrarju tal-istrain taż-Żaire li laqat lir-Repubblika Demokratika tal-Kongo fl-aħħar ġimgħat.
L-Ebola ġeneralment toqtol nofs il-persuni infettati u s-sintomi jinkludu għeja kbira, uġigħ fil-muskoli, uġigħ ta’ ras, uġigħ fil-griżmejn u dijarea.
