Wara ħidma ma’ taqta’ xejn li damet għaddejja xahar sħiħ, il-ħaddiema tas-salvataġġ ta’ Burkina Faso qalu li rnexxielhom isibu l-katavri ta’ erbgħa mit-tmien ħaddiema tal-minjieri li sfaw maqbuda taħt l-art.
Dawn il-ħaddiema, li sfortuntament mietu kollha, kienu qed jaħdmu fil-minjiera taż-żingu f’Perkola meta għargħar wassal biex dawn inqabdu f’fond ta’ 520 metru.
It-tama li l-ħaddiema jinstabu ħajjin kienet sfaxxat fix-xejn hekk kif sar magħruf li ħadd minn dawn il-ħaddiema ma rnexxielu jasal sa dik li hi magħrufa bħala “l-kamra sigura” li hemm fil-minjiera. F’din il-kamra, li tinsab f’fond ta’ 570 metru, tinżamm ħażna ta’ ikel, ilma u anke ossiġnu.
S’issa, il-ħaddiema tas-salvataġġ irnexxielhom jinżlu f’fond ta’ 610 metri u minn din il-minjiera diġà tneħħew 14-il miljun gallun ta’ ilma, iżda fadal xejn inqas minn 100 miljun litru x’jitneħħa.
