Raġel ta’ 38 sena u residenti ir-Rabat, Għawdex, qiegħed jingħata l-kura fl-Isptar Mater Dei għal ġrieħi gravi li sofra meta ntalaqat minn vettura.
Matul il-lejl li għadda, għall-ħabta tas-00:45, il-Pulizija ġew infurmati permezz ta’ telefonata li kien hemm bżonn l-assistenza fi Triq Ħal Far, Birżebbuġa minħabba li kien hemm persuna mixħuta fl-art bil-possibiltà li dan kien iltaqat minn vettura.
Il-Pulizija tad-Distrett marru mill-ewwel fuq il-post u minn investigazzjonijiet preliminari li saru rriżulta li l-vittma – ir-raġel ta’ 38 sena – kien mixi fl-imsemmija triq u ntlaqat minn vettura li allegatament minnufih ħarbet minn fuq ix-xena.
Il-vittma ngħata l-ewwel għajnuna minn persuna li nzerta fl-inħawi qabel ittieħed b’ambulanza l-Isptar Mater Dei. Hemmhekk, hu ġie ċċertifikat li sofra ġrieħi ta’ natura gravi.
L-investigazzjonijiet tal-Pulizija tad-Distrett dwar dan il-każ għadhom għaddejjin.
