Ben Ali Hatem Samara – Tuneżin ta’ 51 sena tressaq – il-Qorti quddiem il-maġistrat Caroline Farrugia Frendo b’rabta ma’ traffikar ta’ persuni. L-awtoritajiet Taljani qed ifittxu l-estradizzjoni tiegħu biex jiskonta sentenza ta’ ħabs wara li nstab ħati ta’ akkużi relatati ma’ falsifikazzjoni ta’ dokumenti u traffikar.
Il-pulizija ppreżentat evidenza li kien raġel imfittex fl-Italja, u talbet lill-qorti biex tikkonforma dan ma’ mandat t’arrest Ewropew biex tkun tista’ tagħti l-kunsens għall-estradizzjoni ta’ tiegħu lejn l-Italja. L-Ispettur Roderick Spiteri ppreżenta dokumenti li kienu jinkludu ritratti u marki tas-swaba’ tal-akkużat li l-awtoritajiet Taljani bagħtu lill-pulizija Maltija. Rapport mit-Taqsima Forensika kkonferma li l-marki tas-swaba’ tar-raġel meħuda f’Malta kienu jaqblu.
L-avukat tal-għajnuna legali Martin Farrugia għamel talba għall-ħelsien mill-arrest, u qal li l-imputat huwa impjegat b’introjtu f’Malta, għandu residenza fissa u saħansitra għandu kontijiet bankarji li jorbtuh mal-pajjiż.
Il-prosekuzzjoni oġġezzjonat għall-fatt li Samara diġà ħarab mill-Italja u minħabba l-fatt li hu diġà nstab ħati b’reat ta’ natura serja.
Il-każ mistenni jkompli jinstema’ fil-jiem li ġejjin.
