Żewġt irġiel inżammu arrestati wara li ġew mixlija li wettqu serqa f’Birkirkara, każ li fih kien irrappurtat li nsterqu mas-€60,000 fi flus kontanti minn fuq raġel fil-garaxx tiegħu.
Il-Pulizija kienet qalet li tliet irġiel mgħammda u armati kienu daħlu fuq ir-raġel, rabtuh u serqulu ammont konsiderevoli ta’ flus kontanti. L-irġiel imbagħad kienu ħarbu minn fuq il-post.
Il-każ seħħ fit-28 ta’ Mejju li għadda, għall-ħabta tas-7.00 a.m. fi Triq Karm Żerafa. Il-vittma kellu bżonn jingħata l-għajnuna minħabba x-xokk li sofra. Il-pulizija bdiet bit-tfittxijiet tagħha għall-allegati ħallelin, li aktar tard instabu u ttieħdu taħt arrest.
Dan wassal biex illum waranofsinhar jitressqu l-Qorti Aaron Cassar ta’ 42 sena residenti Birżebbuġa u Joseph Xuereb ta’ 59 sena mill-Marsa. Huma kienu akkużati b’serq aggravat bi vjolenza, mezzi u valur, li żammu persuna kontra l-volontà tagħhom, kellhom arma u oġġetti misruqa fil-pussess tagħhom u li saru riċedivi.
Iż-żewġt irġiel kienu mixlija wkoll li kisru l-kundizzjonijiet relatati mal-ħelsien mill-arrest tagħhom f’każi separati. Huma wieġbu mhux ħatja u nżammu taħt arrest preventiv wara li ma saret l-ebda talba għall-ħelsien mill-arrest tagħhom.
Il-Prosekuzzjoni tmexxiet mill-Ispetturi Lydon Zammit, Stephen Gulia u Ritienne Gauci. L-Avukati Arthur Azzopardi, Ishmael Psaila u Jacob Magri dehru għall-imputati.
