L-istaġun tas-sajf daħal sew anki jekk għadu fil-bidu tiegħu bit-temperaturi, għal jiem sħaħ, jaqbżu t-30 gradi celsius. Għal bosta Maltin dawn it-temperaturi huma xi ftit qawwijin iżda mhux għat-turisti li bħalissa qed iżuru pajjiżna biex jaraw u japprezzaw is-sbuħija li joffri.
Il-gżira tat-Tliet Għoljiet mhix qed tibqa’ lura lanqas milli tattira iktar turisti lejha. U dan ma jistax jonqos għaliex il-karatteristiċi t’Għawdex huma uniċi u jsaħħruk u ma tantx issib bħalhom.
Wara sentejn ta’ pandemija jidher li l-industrija tat-turiżmu Għawdxija qed tirpilja u tirkupra sew.
