JISSOKTA S-SILENZJU MILL-KAP TAL-OPPOŻIZZJONI

Għaddiet ġimgħa mill-każ li seħħ ġewwa l-każin tal-Partit Nazzjonalista fil-Ħamrun u minkejja li l-Kap tal-Partit Nazzjonalista għamel diversi ġimgħat ferm attiv fuq il-midja tal-partit tiegħu fejn beda jikkarga sew b’dik li skontu kienet tħejjija pjanata u bilgħaqal biex b’partit magħqud warajh imur għall-elezzjonijiet tal-Parlament Ewropew is-sena li ġejja, għall-ewwel darba wara diversi ġimgħat Grech għażel li ma jitkellimx u jibqa’ sieket.

Minn wara l-każ ta’ Jean Paul Sofia li qajjem interess nazzjonali u li mhux biss ġie mressaq quddiem l-ogħla istituzzjoni tal-pajjiż biex tittieħed deċiżjoni rigward jekk kellhiex issir inkjesta pubblika, iżda saħansitra kellek sezzjonijiet tal-midja li minħabba kif żvolġew l-affarijiet anke ppubblikaw l-istħarriġ tagħhom, Grech baqa’ konsistenti fl-appuntament tiegħu man-nies nhar ta’ Ħadd.

Madanakollu jidher li l-Kap tal-Oppożizzjoni għall-ewwel darba wara numru ta’ ġimgħat li fihom għamel saħansitra interventi oħra anke matul il-ġimgħa, ma kienx komdu jitkellem man-nies li skontu tant hu importanti li jinżammu dejjem konxji tal-verità sħiħa.

Nemmnu li waħda mill-ikbar problemi tal-Partit Nazzjonalista u l-midja tiegħu hija l-imġiba fqira tagħhom man-nies tal-partit. Sa ftit tal-ġimgħat ilu kienet il-midja tal-istess partit li b’titlu b’ittri kapitali xandret l-aħbar skontha esklussiva li Dr Abela kien ħarab mill-pajjiż fuq il-jott biex jevita lin-nies, b’ħafna jirreaġixxu li minkejja li l-każ kien wieħed delikat, il-Prim Ministru bħal kull persuna oħra kellu dritt li jieħu xi jiem ta’ mistrieħ ukoll. Kien proprju f’dak il-perjodu li Grech u l-midja tiegħu bdew joħorġu diversi stqarrijiet maħruġa mill-partit, fejn saħansitra kien hemm sejħiet fejn Grech qal li “kien se jindirizza n-nazzjon”.

Għalkemm tista’ tgħid li Grech ma waqafx għalkollox fuq il-midja fl-aħħar jiem, ritratti bi kliem mill-inqas u mingħajr vuċi jikkonfermaw id-dgħufija tiegħu quddiem każ li nemmnu li seta’ faċilment jispjega minflok jagħmel minn kollox biex kemm jista’ jkun ma joħroġ xejn fil-beraħ.

Il-mara tal-vittma kellha wkoll mistoqsija ma’ dan il-ġurnal fejn filwaqt li esprimejna solidarjetà magħha staqsiet kif jista’ jkun li kull ċuċata tixxandar fuq il-facebook b’filmati u f’festa li għaliha attendew mijiet ta’ nies, ħadd ma kellu xi forma ta’ evidenza ta’ dak li sofra żewġha.

Qalb din il-ġlieda interna fil-Partit Nazzjonalista, il-Gvern immexxi minn Robert Abela għadu għaddej jieħu d-deċiżjonijiet. Sal-bieraħ stess f’intervent ħabbar li se jkun qiegħed iwettaq wegħda elettorali oħra – li se jidħlu inċentivi biex membri ta’ forzi dixxiplinati jibqgħu jservu wara 25 sena servizz.

Għalhekk nemmnu li l-Partit Nazzjonalista u bil-wisq aktar Bernard Grech għadu ma tgħallem xejn minkejja politika ta’ firda li ratu jieħu l-akbar telfiet elettorali konsekuttivi.