Tħabbar b’mod uffiċjali l-programm uffiċjali tal-Vjaġġ Appostoliku tal-Papa Franġisku f’Malta fit-2 u t-3 ta’ April 2022. Dan il-programm ġie ppubblikat illum mis-Sala Stampa tas-Santa Sede.
Il-Papa mistenni jitlaq mill-Ajruport ta’ Fiumicino, Ruma, għall-ħabta tat-8.30 a.m. u mistenni jasal Malta għall-ħabta tal-10.00 a.m. Wara se ssir ċerimonja tal-wasal fl-ajruport u jibqa’ sejjer il-Palazz tal-Gran Mastru fil-Belt fejn se jagħmel żjara ta’ korteżija lill-President tar-Repubblika George Vella.
Imbagħad il-Papa se jiltaqa’ mal-Prim Ministru, mal-ogħla awtoritajiet tal-pajjiż u l-Korp Diplomatiku. Waranofsinhar, il-Papa se jitlaq bil-katamaran mill-Port il-Kbir lejn Għawdex fejn se jmexxi laqgħa ta’ talb fis-Santwarju Nazzjonali tal-Madonna ta’ Pinu f’Għawdex. Wara, il-Papa se jitlaq bil-vapur lejn iċ-Ċirkewwa.
Il-Ħadd filgħodu huwa se jkollu laqgħa privata mal-Ġiżwiti fin-Nunzjatura Appostolika f’Tal-Virtù u wara se jżur il-Grotta ta’ San Pawl fil-Bażilika ta’ San Pawl, ir-Rabat. Fl-10.15 a.m. issir quddiesa fuq il-Fosos tal-Floriana u fi tmiemha jgħid it-talba tal-Angelus.
Għall-ħabta tal-4.45 p.m. il-Papa se jżur l-immigranti fil-Laboratorju tal-Paċi f’Ħal Far. Fi tmiem din iż-żjara huwa jmur lejn l-Ajruport Internazzjonali ta’ Malta għaċ-ċerimonja tat-tluq.
