Raġel ta’ 44 sena minn San Ġiljan tpoġġa taħt ordni ta’ probation wara li ammetta li ta fastidju lill-eks sieħba tiegħu permezz ta’ telefonati u billi mar id-dar tagħha mingħajr ma kien mistieden.
Ir-raġel, li fil-Qorti qal li jaħdem bħala kok, tressaq quddiem il-Maġistrat Rachel Montebello mixli b’fastidju, użu ħażin ta’ apparat ta’ komunikazzjoni elettronika, li ħebb għall-mara u darabha ħafif u li heddidha.
L-Ispettur Eman Hayman, li mexxa l-Prosekuzzjoni, spjega fil-Qorti li l-akkużat u l-allegata vittma nfirdu f’Ġunju wara “ġlieda żgħira”. Il-kuntatt bejn il-partijiet kien inqata’ iżda xahar wara, ir-raġel reġa’ beda jagħmel “ammont kbir ta’ telefonati lill-mara”.
L-Ispettur żied jispjega li t-telefonati komplew anke wara li l-akkużat kien tkellem mal-pulizija. “Huwa kien imsejjaħ għall-interrogazzjoni. Malli telaq, mar dritt id-dar tal-mara u nqabad mill-kamera tar-residenza jdoqq il-qanpiena tagħha.”
Ir-raġel wieġeb ħati tal-akkużi miġjuba kontra tiegħu, liema ammissjoni ġiet ikkonfermata minnu anke wara li l-Qorti wissietu li l-akkużi jistgħu jwasslu għal piena ta’ ħabs.
Fis-sottomissjonijiet dwar il-piena, l-Ispettur Hayman qal li r-raġel kien għaraf l-iżball li għamel u anke ta stqarrija f’dan ir-rigward. Qal ukoll li d-djar tal-partijiet kienu jinsabu fl-istess lokalità.
Il-Qorti preseduta mill-Maġistrat Rachel Montebello, filwaqt li sabitu ħati tal-akkużi poġġietu taħt ordni ta’ probation għal 18-il xahar flimkien ma’ ordni ta’ trażżin għall-istess perjodu.
Il-Qorti wissietu lill-ħati li kellu jifhem li r-relazzjoni tiegħu mal-vittma kienet spiċċat u li kien qed jagħmel reat kriminali meta jiffastidjaha. Min-naħa tiegħu, ir-raġel iddikjara li kien se jżomm id-distanza tiegħu minn mal-mara u kien se jieqaf iċemplilha.
