Is-Solidarity Payments għall-istaġun 2025/26 tqassmu lill-klabbs membri b’timijiet tal-youths u nurseries tal-futbol nhar is-Sibt filgħodu waqt avveniment eċċitanti fiċ-Ċentru Nazzjonali tal-Futbol tal-Malta FA.
It-Training Grounds kienu mimlija attività hekk kif tfal minn 31 nurseries tal-futbol minn madwar il-gżira kollha kellhom l-opportunità li jilagħbu u jgawdu l-logħba li jħobbu fuq il-grawnds tat-turf naturali.Il-Malta FA, flimkien mal-Youth FA organizzat il-festival annwali tal-futbol, b’sensiela ta’ logħbiet żgħar li saru fil-post. Il-kategorija tan-nurseries ta’ din is-sena kienet il-grupp ta’ età taħt it-8 snin.
Is-Solidarity Payments ta’ dan l-istaġun tqassmu lin-nurseries barra mill-Premier League, peress li l-klabbs mill-ogħla livell diġà rċevew fondi ta’ solidarjetà permezz tal-UEFA. Il-fondi mqassma waqt l-avveniment tas-Sibt ingħataw wara ftehim mal-Ministeru għall-Intern, is-Sigurtà u l-Impjiegi.Il-Ministru għall-Intern, is-Sigurtà u l-Impjiegi l-Onor. Byron Camilleri u l-President tal-Malta FA Bjorn Vassallo kienu preżenti għall-avveniment, flimkien mal-President Onorarju u Fundatur tal-Youth FA Fr Hilary Tagliaferro.Il-plejers żgħażagħ min-nurseries differenti wrew il-passjoni tagħhom għall-isport, billi qattgħu filgħodu pjaċevoli hekk kif ikkompetew f’sensiela ta’ logħbiet b’timijiet żgħar, iltaqgħu ma’ tfal oħra minn nurseries differenti, u lagħbu fl-istess grawnds bħat-timijiet nazzjonali.
F’kumment dwar din l-inizjattiva, il-President tal-Malta FA Bjorn Vassallo rrimarka: “It-tfal fl-isport u l-iżvilupp tagħhom huma l-pedamenti tal-ġenerazzjoni ta’ għada, u l-impenn tal-FA ta’ Malta flimkien mal-awtoritajiet huwa li niżguraw li nagħmlu l-logħba aċċessibbli għal kulħadd, bil-għan li nkomplu nkissru l-ostakli.”
“Il-futbol f’dan il-livell bażiku joffri opportunitajiet għall-għaqda f’ambjent san u rikreattiv, u għalhekk nirringrazzja lin-nurseries u l-klabbs membri għad-dedikazzjoni tagħhom biex ikomplu jsaħħu l-iżvilupp u l-ħiliet tal-atleti żgħażagħ tagħna. Il-missjoni tal-futbol mhix biss dwar it-timijiet nazzjonali jew il-futbol ta’ livell elite, iżda trid tiffoka wkoll fuq il-bidla soċjali permezz tal-komunitajiet lokali. Dan kollu huwa possibbli grazzi għax-xogħol bla heda mwettaq minn kull min hu involut f’dan is-settur f’pajjiżna,” żied jgħid.Il-Ministru għall-Intern, is-Sigurtà u l-Impjiegi, Byron Camilleri, spjega li permezz ta’ dan l-investiment fit-tfal, irridu narawhom attivi fin-nurseries, fejn il-benefiċċji jinkludu s-saħħa, l-edukazzjoni, l-iżvilupp, relazzjonijiet aktar b’saħħithom u fuq kollox gost u tgawdija, fi tfulija li tiġi darba biss.“Għalhekk, dan l-investiment fit-tfal jallinja direttament mal-objettivi tal-NDSF kemm fl-aspetti tal-iżvilupp kif ukoll soċjali. Fuq kollox, diġà nafu li se jkun investiment li se jagħtina, bħala soċjetà, valur ferm akbar minn dak li jalloka l-NDSF. Kollox jibda minn xi ħaġa żgħira. L-istess japplika fil-futbol, m’hemm l-ebda plejer kbir li ma bediex f’età żgħira,” kompla l-Ministru Camilleri.Il-President Onorarju u Fundatur tal-Youth FA Fr Hilary Tagliaferro esprima l-ferħ tiegħu għall-appoġġ li qed jirċievu l-klabbs tal-futbol u n-nurseries.“Il-Gvern jirrikonoxxi l-ħtieġa li s-soċjetà Maltija jkollha istituzzjonijiet u nurseries b’saħħithom għaż-żgħażagħ fejn it-tfal jistgħu jsaħħu l-passjoni tagħhom għall-isport, speċjalment il-futbol. Ninsab kuntent ħafna li nara numru kbir ta’ nurseries u tfal dalgħodu, jilagħbu flimkien u jirċievu l-għajnuna finanzjarja li jistħoqqilhom,” ikkonkluda.