L-Istitut tal-Istudji Turistiċi (ITS) fetaħ uffiċjalment is-sena akkademika 2024-2025, u laqa ġewwa fih għadd akbar ta’ studenti ġodda. Din is-sena fil-fatt, l-ITS ra żieda notevoli ta’ 17% f’applikazzjonijiet ġodda meta mqabbla mas-sena ta’ qabel,
Is-sena akkademika l-ġdida fetħet uffiċjalment il-bieraħ 30 ta’ Settembru, b’ċerimonja li tat bidu għat-tagħlim, bi tkabbir sostanzjali fil-livelli u d-dixxiplini akkademiċi kollha. Programmi bħall-ġestjoni tal-avvenimenti, l-ivvjaġġar u t-turiżmu, il-ġestjoni tal-ospitalità internazzjonali, l-arti kulinari, l-ivvjaġġar favur il-klima, u l-gwida tat-turisti, kollha raw żieda qawwija fin-numru tal-istudenti. B’mod partikolari, il-korsijiet tal-Fondazzjoni u taċ-Ċrtifikat urew żidiet notevoli.
Il-programm taċ-Ċrtifikat tal-Ivvjaġġar u t-Turiżmu kważi rdoppja l-konsum tiegħu mis-sena ta’ qabel, u rreġistra 31 student. Barra minn hekk, l-Higher National Diploma in Tourist Guiding offruta kemm full-time kif ukoll part-time, rat żieda sinifikanti, b’60 student jirreġistraw, żieda ta’ aktar minn 20 fuq tas-sena l-oħra.
Ministru għat-Turiżmu u l-Indafa Pubblika, Clayton Bartolo, waqt li ndirizza lill-istudenti qal li din is-sena hija sena oħra ċentrali għall-Istitut tal-Istudji Turistiċi. Sena akkademika li timmarka mhux biss il-bidu ta’ sena skolastika ġdida iżda t-tkomplija ta’ vjaġġ edukattiv li se jsawwar il-futur tal-industrija turistika ta’ Malta.
Dan juri r-rikonoxximent dejjem jikber tar-rwol kritiku li għandha l-industrija tat-turiżmu fl-ekonomija u l-identità kulturali ta’ Malta sostna l-Ministru Bartolo.
Waqt iċ-ċerimonja, Matthias Muscat, student li qed isegwi l-Undergraduate Diploma in Rooms Division Management, għamel diskors ta’ ispirazzjoni lil sħabu l-istudenti, fejn ħeġġiġhom biex qatt ma jaqtgħu qalbhom mill-ħolm tagħhom. Filwaqt li ddeskriva l-esperjenza tiegħu fl-ITS bħala waħda ta’ sodisfazzjon, b’mod partikolari enfasizza l-internship internazzjonali tiegħu ta’ sena fi proprjetà ta’ ħames stilel fuq il-kosta tal-punent tal-Irlanda.
