FʼDiċembru 2024, l-għadd ta’ kuntratti ta’ bejgħ ta’ proprjetà residenzjali ammonta għal 1,113, li juri żieda ta’ 64 kuntratt meta mqabbel ma’ dawk li kienu rreġistrati sena qabel.
Fl-istess xahar, kienu rreġistrati 1,044 konvenju, li juru tnaqqis ta’ sebaʼ konvenji meta mqabblin ma’ dawk tal-2023.mMeta mqabblin mal-ammonti rreġistrati fʼDiċembru 2023, il-kuntratti ta’ bejgħ żdiedu bʼ6.1 fil-mija, filwaqt li l-konvenji naqsu bʼ0.7 fil-mija.
Statistika maħruġa mill-Uffiċċju Nazzjonali tal-Istatistika (NSO) turi li f’Diċembru li għadda, 89.6% fil-mija tal-kuntratti kienu jikkonsistu minn xerrejja individwali, filwaqt li kważi l-bqija tal-kuntratti l-oħra kienu magħmula minn kumpaniji.
Il-valur tal-kuntratti li jinvolvu xerrejja individwali kien jammonta għal €252.0 miljun, li huwa ekwivalenti għal 71.9% tal-valur totali.
L-akbar għadd taʼ kuntratti taʼ bejgħ kien irreġistrat fid-Distrett tat-Tramuntana tal-Port u fid-Distrett tat-Tramuntana, bʼtotal taʼ 275 u 217 -il kuntratt rispettivament. L-inqas numri taʼ kuntratti kienu nnotati fid-Distrett tal-Punent u fid-Distrett taʼ Għawdex u Kemmuna b’91 u b’146 kuntratt rispettivament.
L-akbar ammont taʼ kuntratti taʼ bejgħ kien irreġistrat fʼdawn il-lokalitajiet: San Pawl Il-Baħar (85), Birkirkara (62) u Il-Mosta (49)
