Wara s-suċċess tas-sena l-oħra fix-xena mużikali kemm lokali kif ukoll internazzjonali, il-produttur tal-mużika lokali Johann Caruana jirritorna bl-ewwel album tiegħu, Astra Nomina, disponibbli fuq il-pjattaformi ewlenin kollha tal-istriming mill-31 ta’ Jannar 2026.
Astra Nomina huwa vjaġġ strumentali ta’ 12-il kanzunetta b’għeruq fondi fl-ispirtu melodiku, emottiv u ipnotiku tat-trance klassiku Ewropew. Johann jieħu ispirazzjoni minn artisti li jiddefinixxu l-ġeneru bħal Mauro Picotto, Paul van Dyk, Tiësto, ATB, u Alice Deejay. L-album jgħaqqad l-enerġija qawwija li hi assoċċjata mat-trance ma’ sens qawwi ta’ atmosfera, nostalġija, u reżonanza emozzjonali.
It-titlu Astra Nomina ġej mil-Latin, u jikkombina “Astra” (stilel) u “Nomina” (ismijiet). Flimkien, il-frażi tissarraf f'”Ismijiet tal-Istilel”—metafora poetika li tirrifletti temi ta’ identità, aspirazzjoni, u l-faxxinu etern tal-umanità mal-kosmos. L-istilel hawn mhumiex sempliċement stilel, iżda simboli ta’ memorja u dawl gwida.
L-album, li jkopri 47 minuta, jiżvolġi bħala esperjenza ta’ smigħ kontinwu aktar milli bħala ġabra ta’ diski waħedhom. Ritmi elettroniċi vibranti huma minsuġa ma’ elementi modali, melodiċi u atmosferiċi, ispirati mit-tradizzjonijiet Biżantini, Ċeltiċi u Gregorjani. Dan l-album joħloq relazzjoni fejn il-lingwa mużikali antika tiltaqa’ mal-arkitettura tat-trance moderna. Ir-ripetizzjoni ssir ritwali, il-melodija ssir memorja, u t-trance joħroġ bħala forma ta’ espressjoni universali u bla żmien.
Iddisinjat bħala vjaġġ bla xkiel bejn l-antik u l-kożmiku, Astra Nomina jistieden lis-semmiegħa f’esperjenza immersiva, kważi ċerimonjali—waħda li tibbilanċja l-momentum qawwi tat-trance mal-introspezzjoni u l-fond emozzjonali. Huwa vjaġġ eklettiku iżda koeżiv, maħdum kemm għal moviment, kif ukoll għal smigħ waqt mumenti ta’ rifflessjoni.