José Mourinho ġie mżeblaħ fuq Twitter wara t-telfa ta’ Roma 4-0 barra minn darhom kontra Udinese il-Ħadd filgħaxija.
Dan ir-riżultat qed jitqies bħala sorpriża kbira meta minn erba’ logħbiet il-Giallorossi kisbu 10 punti, bi tliet rebħiet u draw.
Għaldaqstant Roma kienu favoriti iżda rriżulta li dan l-iskor kien esperjenza qarsa għall-players ta’ Mourinho li sofrew l-ewwel goal wara biss ħames minuti … bit-tlieta l-oħra jaslu wara l-mistrieħ.
“Din hija t-tip ta’ ġurnata fejn il-players kellhom bżonn il-kenn tiegħi. Iddiskutejna din it-telfa u għidtilhom li aħjar titlef darba 4-0 milli erba’ darbiet 1-0, ”qal Mourinho.
“Meta titlef 4-0, ma tistax titkellem dwar ir-referee, imma meta smajna li dan kien ir-referee tal-logħba, indunajna li kien ir-referee perfett biex team bħal Udinese jilgħab f’daru. L-ewwel karta safra marret għand il-protgonista tal-partita … dan jgħid kollox.”
Mourinho ġie mżeblaħ fuq Twitter b’għadd ta’ karikaturi kif ukoll kummenti.
Issa huma għandhom 10 punti minn ħames logħbiet, wieħed wara l-leaders Napoli u Milan. Madankollu, Atalanta jistgħu jaqbżu fil-quċċata tal-klassifika jekk it-Tnejn jegħlbu lil Monza barra minn darhom.
