Wolves ħatru lill-Ispanjol Julen Lopetegui bħala l-manager il-ġdid tagħhom wara li inizjalment kien irrifjutahom.
L-eks player ta’ 56 sena se jieħu t-tmexxija fl-14 ta’ Novembru, meta l-Premier League ikun wieqaf minħabba t-Tazza tad-Dinja fil-Qatar.
Lopetegui kien l-ewwel għażla tal-club wara t-tkeċċija ta’ Bruno Lage fit-2 ta’ Ottubru iżda huwa għażel li jibqa’ fi Spanja biex ikun ħdejn missieru anzjan.
“Julen huwa coach mill-aqwa, b’esperjenza eċċellenti fil-livell elite tal-logħba,” qal iċ-chairman ta’ Wolves Jeff Shi.
“Sa mill-bidu nett, Julen kien l-għażla numru wieħed tagħna biex jieħu t-tmexxija tat-team u nistennew bil-ħerqa li nilqgħu lilu u lit-team tal-istaff tiegħu meta jingħaqdu magħna fil-ġimgħat li ġejjin.”
L-ewwel partita ta’ Lopetegui se tkun barra ma’ Everton fil-Premier League fis-26 ta’ Diċembru.
