L-istilla ta’ River Plate Julian Alvarez stqarr li se jikkunsidra l-futur tiegħu mal-club f’Jannar, fost interess rappurtat minn għadd ta’ clubs Ewropej fosthom Manchester United.
L-attakkant ta’ 21 sena stabbilixxa ruħu bħala wieħed mill-aqwa prospetti fl-Arġentina, fejn skorja 18-il goal u pprovda seba’ assists f’21 dehra fil-kampjonat dan l-istaġun, u għen lil River Plate jirbħu l-ewwel titlu domestiku tagħhom f’seba’ snin.
Il-kuntratt attwali ta’ Alvarez se jiskadi f’Diċembru tal-2022 u għandu klawsola ta’ release ta’ £17-il miljun, li ġibdet l-għajn ta’ Manchester United, kif ukoll lir-rivali Manchester City, Real Madrid, Bayern Munich u Inter Milan.
L-internazzjonali Arġentin mistenni jħalli l-club f’waħda mit-twieqi tat-trasferimenti li jmiss, iżda jsostni li mossa potenzjali għadha mhix f’moħħu.
“Frankament, ma nafx x’se jiġri, issa qed naħseb biss biex niċċelebra. F’Jannar naraw,” qal Alvarez lill-istampa wara t-trijonf tat-Trofeo de Campeones ta’ River Plate.
Meta mistoqsi jekk trasferiment jistax ikollu impatt fuq iċ-ċansijiet tiegħu li jirrappreżenta lill-Arġentina fit-Tazza tad-Dinja tal-2022, l-attakkant żied jgħid: “Aħna lkoll nafu kemm tfisser it-Tazza tad-Dinja għall-player. Meta nieħu d-deċiżjoni tiegħi nagħżel x’inhu l-aħjar għalija. “
Rapport wieħed preċedenti sostna li Manchester United diġà rreġistraw l-interess tagħhom f’Alvarez, hekk kif għandhom l-għan li jegħlbu lir-rivali tagħhom fit-tellieqa biex jiffirmaw lill-attakkant ta’ talent.