Birkirkara St Joseph Sports Club ospita t-tielet tiġrija tal-Go&Fun BSJ Sprint Triathlon Series li serviet wkoll bħala l-Kampjonati Nazzjonali Sprint Triathlon.
Kai Azzopardi, ta’ ħmistax-il sena, rebaħ l-ewwel tellieqa tal-kbar Sprint Triathlon u b’hekk kien wieħed mill-iżgħar triatleti li qatt rebaħ titlu ta’ Kampjonat Nazzjonali. Dan ir-riżultat isegwi titli oħra li Azzopardi għandu taħt iċ-ċinturin dan l-istaġun, wara li rebaħ il-Kampjonati Nazzjonali tad-Duathlon u l-Akwathlon aktar kmieni dan is-sajf.
Billi kien l-ewwel barra mill-ilma Azzopardi kiseb vantaġġ ta’ erbatax-il sekonda fuq il-konkorrent għat-titlu Keith Galea. Galea, li s-soltu normalment jispikka fit-taqsima tar-rota, irreġistra l-iktar ħin tajjeb fit-taqsima tal-ġirja. Madankollu dan ma kienx biżżejjed biex għeleb lil Azzopardi li spiċċa t-tellieqa fl-ewwel post, erbgħa u għoxrin sekonda qabel Galea. Ryan Muscat li spiċċa fit-tielet post ukoll ta rendikont tajjeb tiegħu nnifsu li pproduċa l-aħjar ħin tiegħu għas-sajf.
Fil-Kategorija tan-nisa, Danica Bonello Spiteri kienet ir-rebbieħa fjen żiedet titlu ieħor ma dawk akkumulati matul is-snin. Il-ħin tat-tmiem tagħha kien l-aħjar reġistrat għall-istaġun. L-għawma b’saħħita tagħha ppermettietha tikseb vantaġġ tajjeb fuq Krista Kuusijarvi, li ħadet it-tieni post. Fit-tielet post kienet Keira Attard. Attard kellha t-tieni l-aktar għawma wara Bonello Spiteri. Attard ilha żżomm it-tielet post fuq il-podju b’mod konsistenti matul is-sajf.
Fi tmiem it-tellieqa ġew ippreżentati trofej lir-rebbieħa u tal-Gruppi ta’ Età mill-membru tal-Bord tal-Federazzjoni Maltija tat-Triathlon John Vella.
Birkirkara St. Joseph Sports Club jirringrazja lil-Go&Fun, il-Kunsill Lokali tan-Naxxar u l-Malta Triathlon Federation talli appoġġjaw dan l-avveniment.
L-aħħar tiġrija tal-Go&Fun BSJ Sprint Triathlon Series se ssir il-Ħadd 25 ta’ Settembru fis-Salina. Ir-reġistrazzjoni tista’ ssir online permezz ta’ din il-link – https://bsj.mt/event/2022-bsj-sprint-triathlon-series-race-4/
Riżultati – Go&Fun BSJ Sprint Triathlon Series (It-Tielet Tellieqa) u Kampjonat Nazzjonali
| Irġiel | Nisa | |
| 1 | Kai Azzopardi (1:02:04) | Danica Bonello Spiteri (1:08:23) |
| 2 | Keith Galea (1:02:28) | Krista Kuusijarvi (1:09:39) |
| 3 | Ryan Muscat (1:04:57) | Keira Attard (1:17:56) |
Trofej Gruppi tal-Eta
| Under 23 | Sean Michael Darmanin | Debora Desira |
| 40-49 | Kristjan Briffa | – |
| 50-59 | Kevin Muscat | Suzanne Farrugia |
| 60+ | Joe Cortis | – |
