It-Tnejn, kompliet il-fażi tal-gruppi tal-Kampjonat Ewropew tas-Snooker li qed isir f’Gandia, fi Spanja fejn il-plejers Maltin rebħu erba’ logħbiet minn ħamsa li lagħbu fihom waqt it-tieni jum ta’ kompetizzjoni.
F’din il-ġurnata daħal fl-azzjoni c-champion lokali kurrenti, Brian Cini, li minkejja li lagħab kontra avversarju inferjuri, l-Ispanjol, Jose Ignacio Enciso, huwa xorta pproduċa prestazzjoni mill-aqwa u fit-tliet frames wettaq breaks tajbin. Fil-fatt fit-tlett frames li ntlagħbu huwa wettaq breaks ta’ 86 punt, 101 punt u 66 punt rispettivament biex rebaħ il-logħba b’dawn il-punteġġi; 90-0, 112-8 u 75-14.
Aaron Busuttil, Chris Peplow u Joseph Casha, t-tlieta li huma rebħu bi skor identiku ta’ 3-1 u b’hekk kisbu t-tieni rebħa. Peplow u Casha huma l-ewwel żewġ plejers Maltin li matematikament ikkwalifikaw għat-tieni round filwaqt li Busuttil jiġi eliminat biss fl- eventwalità li ma’ jirbaħ l-ebda frame fl-aħħar logħba filwaqt li l-avversarju li rebaħ kontrih fit-tieni logħba jirbaħ 3-0.
Aaron Busuttil rebaħ kontra Martin Orinak tas-Slovakkja, 38-58, 66-33, 64-40 u 86-29, filwaqt li Chris Peplow għeleb lil Awstrijak, Thomas Janzso, 52-85, 69-2, 66-18 u 56-9. Kemm Busuttil kif ukoll Peplow tilfu l-ewwel frame iżda rkupraw tajjeb u wara rebħu tliet frames infila. Joseph Casha rebaħ kontra Kayhan Durukan tat-Turkija bl-iskors ta’ 67-44, 82-56, 30-60 u 65-43.
L-uniku plejer li tilef kien Philip Ciantar li lagħab kontra c-champion kurrenti Spanjol, Daan Leyssen Janssens li għeleb lil Malti, 3-0, bil-frames jintemmu, 50-54, 32-66 u 2-69. Il-kwalifikazzjoni ta’ Ciantar issa tiddependi mill-logħbiet li jonqos fi Grupp S. Li hu żgur hu li peress li Ciantar it-Tlieta ma’ jmissux jilgħab u l-aħħar logħba tiegħu tagħlaq dan il-grupp, l-eżitu tal-konfront bejn iż-żewġ plejers li diġà lagħab magħhom ser jagħti indikazzjoni jekk ikunx possibbli li jikkwalifika.
It-Tlieta, l-erba’ plejers Maltin l-oħra jtemmu l-impenji tagħhom fil-fażi tal-gruppi fejn Brian Cini jrid jilgħab darbtejn. Il-logħbiet tal-plejers Maltin fit-tielet jum ta’ dan il-kampjonat ser ikunu dawn:
| 12:30 | Group AO | Brian Cini | vs | Diego Minxalli (Albanija) |
| 15:00 | Group E | Aaron Busuttil | vs | Sebastiaan Kan (Olanda) |
| 15:00 | Group F | Chris Peplow | vs | Fabian Haken (Ġermanja) |
| 15:00 | Group G | Joseph Casha | vs | Craig Steadman (Ingilterra) |
| 17:30 | Group AO | Brian Cini | vs | Amaan Iqbal (Skozja) |