Kosovo ……….6
Malta ………….0
Malta bdiet ir-round tal-kwalifikazzjoni tal-Kampjonat Ewropew ta’ Taħt id-19-il sena tan-Nisa, b’telfa kbira ta’ 6-0 kontra l-Kosovo, fis-Centenary Stadium, bl-avversarji jirriżultaw bħala wisq b’saħħithom għaż-żgħażagħ Maltin.
Il-Kosovo bdew bħala l-aktar b’saħħithom u damu biss sitt minuti biex ħolqu l-ewwel oppurtunitá ta’ skor. Sahare Berisha ittantat xortiha b’xutt mid-distanza, iżda dan ġie salvat mill-goalkeeper, Erika Muscat, li mbagħad ġabret il- ballun bla wisq tbatija.
Malta wieġbet fis-17-il minuta u kellha ċans tajjeb li tiftaħ l-iskor meta f’kontrattakk veloċi, il-ballun intemm għand Ema Micallef, li venvnet xutt b’saħħtu li stampa mal-mimduda.
Madankollu, fil-21 minuta, il-Kosovo fetħu l-iskor, wara li corner ma ġiex ikklerjat mid-difiża Maltija, b’Elona Paci titfa’ l-ballun fix-xibka mill-viċin. Il-Kosovo reġgħu heddew fis-26 minuta meta Riga Kallaba ġiet wiċċ imb’wiċċ ma’ Muscat, iżda l-goalkeeper Maltija antiċipat biex ċaħħdet lill-avversarji mit-tieni goal.
Erba’ minuta wara, Muscat reġgħet ġiet imsejħa fl-azzjoni b’save eċċellenti hekk kif il-Kosovo komplew iżidu l-pressjoni.
Peró, fid-39 minuta, l-avversarji skorjaw it-tieni goal meta minn azzjoni ta’ free-kick, Ollsa Maqastena, mill-viċin ma fallitx.
Malta għamlet reazzjoni meta minn corner, il-ballun wasal għand Stella Francalanza, li kellha d-daqqa ta’ ras tintemm ftit barra.
Iżda l-Kosovo daħlu jistrieħu fil-vantaġġ ta’ tliet goals, hekk kif kontrattakk veloċi wassal biex Paci tegħleb lil Muscat.
Fi-tieni taqsima, il-Maltin ħarġu aktar kunfidenti u rebħu aktar dwelli u pussess tal-ballun. Minkejja dan, fis-57 minuta, l-avversarji skorjaw ir-raba’ goal meta Riga Kallaba sparat il-ballun fix-xibka wara taħwida quddiem il-lasti Maltin.
Fis-70 minuta, il-Kosovo għamluhom ħamsa minn Paci biex b’hekk irreġistrat hat-trick personali.
Imbagħad, fid-90 minuta, huma ssiġillaw ir-rebħa permezz ta’ Besjana Zogaj.
Malta terġa’ tkun impenjata, nhar il-Ġimgħa li ġej, kontra l-Latvja, fis-2.30 pm.
Fil-logħba l-oħra, il-Latvja għelbu lil Kazakhstan 3-1.
KOSOVO: 1-Djellza Mehmeti, 2-Aurora Cakolli (13-Rita Feka 83), 3-Ramize Orana (21-Agnesa Aliu 76), 5-Aurora Mulliqi, 6-Besjana Zogaj, 7-Elona Paci, 9-Riga Kallaba, 10-Sahare Berisha (18-Albinga Gegaj 76), 17-Liza Hoxha, 20-Olsa Maqastena (15-Shenarta Bela 46), 22-Imeraj Aurela (19-Elda Nuredini 66) – Coach: Albina Rrahmani
MALTA: 1-Erika Muscat, 4-Amber Galea, 5-Fatma Al Girbi (8-Amelia Vassallo 46), 6-Ema Micallef, 7-Lara May Azzopardi, 10-Crista Chetcuti Ganado, 14-Shannen Mallia (2-Michela Rose Ionadi 46), 15 Thea Ida Scicluna (13-Megan La Rosa 83), 20-Ylenia Azzopardi (9-Nilayza Attard 76), 21-Francesca Bartolo (18-Shana Farrugia 76), 22-Stella Francalanza – Coach: David Attard
REFEREE: Kristina Kozoroh (Ukrajna)
ASS. REFEREES: Svitlana Grushko (Ukrajna), Isabelle van Gilst (Olanda)
RABA’ UFF: Wendy Gijsbers (Olanda)
SKORERS: E. Paci 21, 41, 70, O. Maqastena 39, R. Kallaba 57, B. Zogaj 89 (K)
AMMONITI: A. Galea, F. Al Girbi, S. Mallia, Ema Micallef (M)