Minn Cristian Muscat
Birkirkara ……..1
Floriana …….….0
F’partita ferm movimentata, Birkirkara għelbu lil Floriana bl-iskor minimu ta’ 1-0 biex l-Istripes baqgħu b’punti massimi minn tliet logħbiet u jinsabu waħedhom fil-quċċata tal-klassifika.
Kien fis-16-il minuta li waslet l-ewwel azzjoni denja ta’ nota bl-Istripes ikunu huma li joħolqu l-periklu meta cross insidjuż ta’ Cain Attard kważi qarraq għal kollox bil-goalkeeper Bulgaru, Georgi Kitanov, li għal ftit ma kkomettiex auto-goal, fejn fortunatament għalih ra l-ballun jintemm f’corner.
Floriana wieġbu fit-33 minuta meta Eden Hershkovich waħdu quddiem il-goalkeeper Taljan, Giacomo Nava, ra lil dan tal-aħħar isalva tajjeb fejn żgur li l-player tal-Greens seta’ għamel aħjar fil-konklużjoni tiegħu.
Il-Furjaniżi komplew fuq l-offensiva u fil-41 minuta, Jan Busuttil, indirizza free-kick insidjuż fil-kaxxa bi Christian Rutjens ma jolqotx il-ballun b’rasu biex intemm f’idejn Nava, bl-Istripes jeħilsuha ħafif.
L-Istripes irrispondew fil-45 minuta meta Kevin Tulimieri għadda tajjeb lejn Alex Da Paixao Alves, iżda pront kien id-difensur ta’ Floriana Oualid El Hasni li interċetta tajjeb qabel seta’ jilħaq Enzo Daniel Cabrera.
It-tieni taqsima bdiet b’tentattiv ta’ Eden Hershkovich li ntemm għoli iżda fit-53 minuta Birkirkara resqu viċin meta l-ballun wasal għand Alex Da Paixo Alves wara li xellef il-ballun Matias Garcia iżda x-xutt tiegħu ġie salvat minn Kitanov.
Fil-61 minuta, Kemar Reid kellu x-xutt tiegħu jgħaddi ftit barra u fil-75 minuta, Birkirkara skorjaw il-goal tar-rebħa meta Cain Attard għadda tajjeb lejn Paul Mbong li kompla lejn KEVIN TULIMIERI li wara li qabeż difensur xeħet fir-rokna tax-xibka.
Fil-81 minuta, Birkirkara resqu viċin li jirduppjaw l-iskor meta Paul Mbong kellu xutt sabiħ salvat mill-goalkeeper Furjaniż megħjun mill-wieqfa.
BIRKIRKARA: 1-Giacomo Nava, 5-Enrico Pepe, 6-Diego Pires Dall’Oca (77-Denis Custodio Ribeiro 83), 7-Alex Da Paixao Alves, 8-Yannick Yankam, 11-Kurt Zammit (2-Osvaldo Iorio 46), 22-Cain Attard, 25-Neil Micallef (10-Paul Mbong 59), 30-Enzo Daniel Cabrera (20-Federico Falcone 59), 72-Alessandro Coppola, 92-Kevin Tulimieri (4-Adam Camilleri 93) – Coach: Giovanni Tedesco
FLORIANA: 33-Georgi Kitanov, 2-Adam Magri Overend, 3-Christian Rutjens, 4-Oualid El Hasni, 9-Andrei Ciolacu, 20-Matias Nicolas Garcia, 21-Carlo Zammit Lonardelli, 25-Lorenzo Trillo, 28-Emiliano Callegari (7-Mattia Veselji 77), 30-Jan Busuttil (11-James Scicluna 68), 72-Eden Hershkovich (8-Kemar Reid 60) – Coach: Gianluca Atzori
REFEREE: Matthew Degabriele
ASS. REFEREES: Jurgen Spiteri, Mitchell Scerri
RABA’ UFF: Andrea Sciriha
SKORER: K. Tulimieri 75 (B)
AMMONITI: K. Zammit, Y. Yankam, N. Micallef (B), E. Hershovich, J. Busuttil (F)
