B’Hamrun Spartans diġá champions, l-attenzjoni tal-24 ġurnata tal-Kampjonat Premier tkun mixħuta fuq il-partita mill-aktar interessanti bejn Gzira United u Birkirkara li hija konfront dirett min se jispiċċa fit-tieni post.
Logħba oħra interessanti hija dik bejn Mosta u Balzan li għad għandhom it-tamiet tagħhom ħajjin għat-tielet post li jkun ifisser passaġġ għall-kompetizzjoni tal-UEFA Conference League.
It-taqtiegħa għas-salvazzjoni daħlet f’fażi mill-aktar interessanti meta hemm tliet punti biss jifirdu lit-tliet timijiet ta’ Zebbug Rangers, Sta Lucia u Pietá Hotspurs … li għandhom impenji diffiċli kontra Hamrun Spartans, Valletta u Hibernians rispettivament.
Gzira U. v Birkirkara – Gzira United jiffaċċjaw lit-team tal-mument, Birkirkara.
Filwaqt li l-Istripes ilhoma ma jitilfu disa’ partiti, bl-aħħar waħda tkun ir-rebħa mpressjonanti ta’ 5-0 fuq Hibernians, il-Maroons ġejjin minn tliet telfiet konsekuttivi biex ħadu skoss qawwi meta kollox deher li kienu se jtemmu fit-tieni pożizzjoni.
Huma jridu jagħrfu kif se jwaqqfu lil Enzo Cabrera li huwa l-aqwa skorer tal-Karkariżi bi 11-il goal.
Madankollu r-risposta tal-Gzirjani għandha tkun Jefferson De Assis li sab ix-xibka 16-il darba iżda mhux fl-aħħar tliet partiti.
Kull team għandu player sospiż – Luke Tabone għal Gzira u Alex Da Paixao Alvers għal Birkirkara.
Fl-ewwel round iż-żewġ timijiet temmew fi draw ta’ 1-1.
Pietá H. v Hibernians – Din hija partita li xejn għajr minn rebħa ma tissodisfa l-kriterji taż-żewġ timijiet biex iżommu t-tamiet ħajjin għall-għanijiet tagħhom.
Filwaqt li l-Pietaniżi ġejjin minn żewġ rebħiet, il-Pawlisti ġejjin minn żewġ telfiet.
Peró, il-Hotspurs għandhom tliet players sospiżi – Daniel Zerafa, Kian Leonardi u Ganiu Atanda Ogungbe, b’dan tal-aħħar ikun qed jiskonta r-raba’ waħda konsekuttiva.
Min-naħa l-oħra, Hibs se jkollhom jgħaddu mingħajr is-sospiż Thaylor Aldama.
Fl-ewwel round il-Pawlisti kienu rebħu 2-1.
Floriana v Gudja U. – Din hija partita ta’ formalitá minħabba li ż-żewġ timijiet jinsabu fin-nofs tal-klassifika, iżda xorta waħda jinżlu għal rebħa.
Il-Gudjani jimmiraw għall-ewwel rebħa wara telfa u erba’ draws, filwaqt li l-Furjaniżi ġejjin minn żewġ rebħiet.
Huma se jkollhom jgħaddu mingħajr is-sospiż Emiliano Callegari filwaqt li Gudja għandhom sospiżi lil Juan Bolanos Ramires, James Arthur u Johann Bezzina.
Fil-konfront dirett preċedenti, il-Greens kienu ħarġu rebbieħa 3-0.
Sirens v Marsaxlokk – Anke dan il-konront huwa wieħed ta’ formalitá hekk kif iż-żewġ timijiet jinsabu fin-naħa t’isfel tal-klassifika iżda salvi.
Wara erba’ telfiet infila, Sirens irkupraw tajjeb biex fit-tliet logħbiet sussegwenti huma kisbu seba’ punti minn massimu ta’ disgħa u għaldaqstant aċċertaw mis- salvazzjoni.
Ix-Xlukkajri ġejjin minn telfa kontra Pietá Hotspurs bl-iskor ta’ 2-1 u għaldaqstant iridu jpattu għal dan id-diżappunt.
Iż-żewġ timijiet għandhom player sospiż – Ivan Kolev għal Sirens u Leandro Aguirre għal Marsaxlokk.
Mosta v Balzan– Dan huwa konfront mill-aktar interessanti bejn żewġ timijiet li għandhom iċ-ċans li jtemmu fit-tielet post tal-klassifika.
Mosta jinżlu b’moral mill-aktar għoli hekk kif ġejjin minn rebħa ta’ 2-1 fuq Gzira United.
Mhux l-istess jista’ jingħad għal Balzan li ġejjin minn telfa umiljanti ta’ 4-0 kontra Hamrun Spartans.
Għaldaqstant iridu jirriorganizzaw lilhom infushom quddiem team determinat u organizzat.
Mosta għandhom lil Gianluca Sciberras sospiż iżda jirritornaw Jacob Akrong u Jonas Rodrigues Ekani.
Fl-ewwel round, Balzan rebħu lil Mosta bl-iskor ta’ 2-1.
Valletta v Sta Lucia – Din hija partita li Sta Lucia ma jistgħux jitilfu kontra team li bħal donnu sab il-forma wara staġun diżappuntanti.
Filwaqt li Valletta jinsabu fis-seba’ post, il-Luċjani jinsabu fil-post ta’ qabel l-aħħar. Huma kisbu biss rebħa waħda mill-aħħar seba’ logħbiet u rebħa f’dan l-istadju hija tant importanti biex għall-inqas jilagħbu fir-Relegation/Promotion Decider.
L-uniku player nieqes f’din il-partita se jkun is-sospiż Christian Gauci ta’ Valletta … li rebħu l-logħba tal-ewwel round bl-iskor ta’ 2-0.
Hamrun S. v Zebbug R. – Iċ-champions renjanti, Hamrun Spartans, jilagħbu kontra t-team li qed jiġġieled kontra r-relegazzjoni, li iżda, tahom l-unika telfa tal-istaġun bl-iskor ta’ 4-2, liema partita kella tintlagħab f’żewġ ġranet differenti, f’Novembru 2022, minħabba l-maltemp.
Iż-Żebbuġin huma fil-bżonn tal-punti u għaldaqstant jimmiraw li jirrepetu dan is-suċċess.
Min-naħa tal-Ispartans, dawn jippruvaw ikabbru l-vantaġġ f’ras il-klassifika.
Ir-Rangers ma jistgħux jagħmlu użu mis-sospiż Yanis Tonna.
