Meta tintlagħab it-22 ġurnata tal-BOV Kampjonat Premier, teżisti possibbiltá kbira li Hamrun Spartans jiġu dikjarati champions għas-disa’ darba fl-istorja tal-football Malti meta kontra Gzira United, li jinsabu fit-tieni post, ikunu jridu biss punt.
B’hekk huma jżommu l-vantaġġ ta’ 14-il punt u meta jkun fadal erba’ partiti għat-tmiem (12-il punt), huma ma jkunux jistgħu jintlaħqu.
Partita oħra mill-aktar interessanti hija dik bejn Birkirkara u Mosta li filwaqt li jittamaw għal żelqa Gżirjana, xejn għajr minn rebħa ma tissodisfa l-kriterji tagħhom biex ikomplu jisfidaw għat-tieni u t-tielet post li jfisser biljett għall-UEFA Conference League.
Hamrun S. v Gzira U. – Kollox jinsab lest biex Hamrun Spartans jiġu dikjarati champions hekk kif mistennija attendenza kbira fl-Istadium Nazzjonali biex jibdew iċ-ċelebrazzjonijiet ta’ dan id-disa’ rebħ tat-titlu.
Huma se jaffrontaw lil Gzira United li ġejjin minn telfa xejn mistennija kontra Valletta li ma jrid jitnaqqas l-ebda mertu tal-Lilywhites għar-rebħa ta’ 2-1.
Fir-realtá, l-Ispartans iddominaw dan l-istaġun u ħarbu waħedhom biex il-mistoqsija li jsiru champions hija ta’ “meta” u mhux “jekk”.
F’każ li huma joħorġu telliefa, huma jkunu jridu jistennew sal-programm li jmiss, dak tal-1 ta’ April, kontra Balzan.
Għal kontra l-Maroons, l-Ispartans għandhom nieqes lis-sospiż Jonny Torres iżda jirritorna d-difensur Steve Borg minn sospensjoni.
Min-naħa tagħhom, il- Maroons ikunu msaħħa bir- ritorn ta’ Luis Carlos Riascos u Steve Pisani.
Fl-ewwel round Hamrun kienu ħarġu rebbieħa bl-iskor 2-1.
Valletta v Balzan – Dan huwa konfront bejn żewġ timijiet li ġejjin minn rebħa, Valletta kontra Gzira United (2-1) u Balzan kontra Floriana (3-1).
Balzan għandhom bżonn rebħa aktar minn Valletta minħabba li jinsabu fit-taqtiegħa għaż-żona Ewropea filwaqt li l-Beltin jinsabu xxamplati f’nofs il-klassifika. Peró żgur li m’huma se jagħmlu l-ebda pjaċir!
Balzan se jkollhom jgħaddu mingħajr is-servizzi tas-sospiż Angel Yesid Torres li huwa l-aqwa skorer tat-team tiegħu bi 12-il goal. Iżda jirritorna Momcilo Raso minn sospensjoni.
Min-naħa l-oħra, Eslit Sala jirritorna għall-Beltin li fl-ewwel round ħarġu rebbieħa bl-iskor ta’ 3-1.
Hibernians v Marsaxlokk– Hibernians, li jinsabu punt taħt iż-żona Ewropea, ma jistgħux ifallu meta jaffrontaw lil Marsaxlokk li jinżlu għat-tliet punti biex iserrħu rashom mis-salvazzjoni.
Il-Pawlisti jridu juru rispett lejn ix-Xlukkajri wara li dawn tal-aħħar eliminawhom mill-FA Trophy ftit tal-ġranet ilu.
Huma se jkunu mingħajr Gonzalo Llerena filwaqt li Marsaxlokk ma jistgħux jagħmlu użu mill-goalkeeper Marko Drobnjak u Tiago Adan Fonseca minħabba li jinsabu sospiżi.
Iżda għal Marsaxlokk jirritorna Adrian Ferraris.
Fl-ewwel round iż-żewġ timijiet temmew fi draw ta’ 1-1.
Floriana v Zebbug R. – Floriana, li fl-aħħar sitt partita kisbu biss żewġ punti, jiltaqgħu kontra Zebbug Rangers li jinsabu fil-ġlieda kontra r-relegazzjoni hekk kif jinsabu tliet punti biss fuq it-team ta’ qabel l-aħħar, Sta Lucia.
Bla dubju, il-Greens jippruvaw jiġbru ġieħhom f’din il-logħba wara staġun tant diżappuntanti.
Huma se jkollhom jgħaddu mingħajr is-servizzi taż-żewġ players sospiżi, José Arias u Emiliano Callegari filwaqt li r-Rangers għandhom il-players kollha għad-dispożizzjoni.
Fil-konfront dirett, il-Furjaniżi kienu għelbu liż-Żebbuġin bl-iskor ta’ 1-0.
Mosta v Birkirkara – Mosta jiffaċċjaw lil Birkirkara fejn huwa imperattiv li joħorġu rebbieħa hekk kif ġejjin minn telfa ta’ 2-1 kontra Hamrun Spartans.
Jekk Birkirkara joħorġu rebbieħa, il-Mostin jiġu “eliminati” mit-taqtiegħa għat-tielet post. Min-naħa tagħhom, l-Istripes jistgħu jaqbżu fit-tieni post.
L-uniku player sospiż huwa Paul Mbong ta’ Birkirkara iżda jirritorna Osvaldo Iorio minn sospensjoni filwaqt li Tyrone Farrugia u Jacob Akrong jirritornaw għal Mosta li fl-ewwel round rebħu bl-iskor ta’ 2-1.
Pietá H. v Gudja U. – Pietá Hotspurs, li jinsabu fil-qiegħ tal-klassifika, jiltaqgħu kontra Gudja United.
Rebħa għal dawn tal-aħħar tkun tfisser pass ieħor lejn ir-relegazzjoni għall- Hotspurs.
Dawn tal-aħħar għandhom tliet players sospiżi – Terence Agius, Alan Schembri Wismayer u Ganiu Atanda Ogungbe iżda jirritorna Daniel Zerafa filwaqt li Neil Anthony Micallef se jkun nieqes għal Gudja.
Fl-ewwel round Gudja għelbu lil Pietá 1-0.
Sirens v Sta Lucia – Din hija partita bejn żewġ timijiet li ġejjin minn rebħa – Sirens fuq Zebbug Rangers (1-0) u Sta Lucia fuq Pietá Hotspurs (2-1).
Rebħa għal-Luċjani tkun tfisser tama ġdida għas-salvazzjoni.
L-uniku player sospiż huwa dak ta’ Sta Lucia, Rodolfo Soares.
Fl-ewwel round iż-żewġ timijiet spiċċaw 0-0.
