Kampjonat Premier: Hamrun S. u Valletta fl-aqwa logħba ta’ tmiem il-ġimgħa

Bejn illum u għada tintlagħab id-19-il ġur­nata tal-Kampjonat Premier bl-aktar logħba interessanti hija dik bejn ir-rivali antiki, Valletta u Hamrun Spartans, b’dawn tal-aħħar qed igawdu vantaġġ sostanzjali fuq l-istess Beltin.  

Realistikament, bl-Ispartans qed jaħarbu bil-kampjonat, it-taqtiegħa għat-tieni post tkompli tixraħ bejn Gzira United u Birkirkara li jiffaċċjaw lil Sirens u lil Gudja United rispettivament.

Konfront dirett min-naħa t’isfel tal-klassifika huwa dak bejn Sta Lucia u Marsaxokk, b’dawn tal-aħħar jistgħu jinqabdu fil-ġlieda għas-salvazzjoni. 

Harmun S. v Valletta – Din il-partita tqanqal il-memorji tas-snin 80 meta ż-żewġ timijiet kienu ddo­minaw ix-xena lokali. 

Iżda f’dan l-istaġun, il- fortuni ta’ dawn iż-żewġ timijiet huma ferm differenti. Filwaqt li l-Beltin jinsabu fid-disa’ post tal-klassifika, il-Ħamruniżi “għebu fl-orizzont” ta’ dan il-kampjonat hekk kif qed igawdu vantaġġ ta’ 11-il punt f’ras il-klassifika fuq l-eqreb rivali tagħhom, Gzira United … u xejn inqas minn 24 punt fuq il-Lilywhites.  

Valletta ilhom ma jirbħu għal dawn l-aħħar erba’ partiti li fihom kisbu erba’ draws. 

Min-naħa tal-Ispartans, dawn ġejjin minn seba’ reb­ħiet u għaldaqstant jimmiraw li jkomplu għaddejjin b’din is-sensiela po­żittiva.   

Filwaqt li  huma mistennija jinżlu bl-istess formazzjoni li għelbet lil Floriana bl-iskor ta’ 1-0, Valletta jilqgħu lil Ulrich Nnomo Ngong min sospensjoni. 

Fl-ewwel round, Hamrun kienu ħarġu rebbieħa bl-iskor ta’ 1-0. 

Gzira U. v Sirens– Gzira United jiltaqgħu kontra Sirens li ġejjin minn telfa ta’ 2-1 kontra Mosta.

Għall-kuntrarju, il-Maroons ġejjin minn rebħa kbira ta’ 6-0 fuq Pietá Hotspurs bil-protagonista tagħhom qed ikun Jefferson De Assis li bil-hat-trick li skorja, huwa saħħaħ l-ewwel post tal-lista tal-iskorers bi 15-il goal … erba’ aktar minn Elvis Mashike (Hamrun S.), Jurgen Degabriele (Hiber­nians) u Charles Lokoli Ngoy (Zebbug R.).

Huma għandhom lil Jose Costa Silva Ewertton sospiż. 

Fl-ewwel round kienu ħarġu rebbieħa fuq il-Pawlini bl-iskor ta’ 3-0.  

Birkirkara v Gudja U. – Dan huwa konfront delikat għal Birkirkara hekk kif jaffrontaw lil Gudja United li wara bidu ferm tajjeb, niżlu fis-seba’ post tal-klassifika. 

Il-Karkariżi, li ġejjin minn draw ta’ 1-1 kontra Valletta, se jsibu team b’moral għoli hekk kif ġej minn reb­ħa ta’ 3-0 fuq Sta Lucia. 

Huma se jkunu msaħħa bir-ritorna ta’ Andre Prates u Hubert Vella minn sospensjoni filwaqt li Birkirkara se jkunu mingħajr is-sospiż Yannick Yankam. 

Fl-ewwel round iż-żewġ timijiet temmew fi draw ta’ 1-1. 

Zebbug R. v Hiber­nians– Dan huwa test diffiċli għaż-żewġ timijiet. Filwaqt li Zebbug Rangers qed jissieltu biex isalvaw posthom fl-ogħla diviżjoni, Hiber­nians qed jisfidaw għal post mal-ewwel tlieta.  

Iżda huma niżlu fis-sitt post tal-klassifika wara li fl-aħħar ħames logħbiet kisbu biss tliet punti minn rebħa. 

Huma se jkunu mmexxija mill-coach il-ġdid Silvio Vella li fis-snin 90 lagħab u rebaħ kollox magħhom u llum għandu status ta’ leġġendarju. 

Filwaqt li Zebbug Ran­gers għandhom lil Yanis Tonna u Gaetano Gesualdi sospiżi, il-Pawlisti għandhom lil Yunusa Muritala. 

Peró għar-Rangers jirritorna Leandro Almeida minn sospensjoni. 

Fl-ewwel round, Hiber­nians kienu għelbu lil Zebbug bl-iskor ta’ 1-0. 

Balzan v Pietá H.– Balzan, li ġejjin minn rebħa ta’ 2-1 fuq Hibernians, se jilagħbu kontra team ferut hekk kif Pietá Hotspurs ġejjin minn telfa kbira ta’ 6-0 kontra Gzira United. 

Wara bidu pjuttost inċert, b’mod gradwali Balzan telgħu fil-ħames post tal-klassifika wara li fl-aħħar ħames ħarġiet kisbu 13-il punt. 

Għal Pietaniżi, il-”kitba tinsab fuq il-ħajt” minħabba li hija kważi ħaġa ċerta li se jitilfu posthom fil-Premier League. 

Huma għandhom lil Da­niel Zerafa sospiż iżda jirritorna Clinton Bangura minn sospensjoni. 

Il-Balzanin, se jkollhom jgħaddu mingħajr is-sospiż Paul Fenech. 

Fl-ewwel round huma kienu ħarġu rebbieħa bl-iskor ta’ 3-2. 

Mosta v Floriana– Mosta li qed jisfidaw għat-tielet post, jiltaqgħu kontra Flo­riana li ilhom ma jirbħu għal dawn l-aħħar tliet logħbiet hekk kif jinsabu fit-tmien post. 

Iż-żewġ timijiet ma għandhomx players sospiżi filwaqt li Floriana jkunu msaħħa bir-ritorn ta’ Kemar Reid minn sospensjoni. 

Fl-ewwel round iż-żewġ timijiet spiċċaw fi draw ta’ 1-1. 

Sta Lucia v Marsaxlokk – Din hija partita li xejn ħlief rebħa ma tissodisfa l-kriterji taż-żewġ timijiet. 

Rebħa għal Marsaxlokk tkun pass lejn żona komda iżda rebħ għal Sta Lucia tkun tfisser li x-Xlukkajri jistgħu jinqabdu fil-ġlieda tar-relegazzjoni.

Marsaxlokk għandhom lil Christopher Uzeh Edafe sospiż.

Fl-ewwel round iż-żewġ timijiet spiċċaw fi draw ta’ 2-2.