Proprju llum jirritorna l-BOV Kampjonat Premier wara li fi tmiem il-ġimgħa li għadda ngħata spazju għall-FA Trophy.
F’din is-16-il ġurnata, teżisti possibbiltá kbira li l-leaders Hamrun Spartans ikomplu jkabbru l-vantaġġ f’ras il-klassifika meta huma jaffrontaw lit-team ta’ qiegħ il-klassifika, Pietá Hotspurs, filwaqt li Gzira United għandhom partita delikata kontra Marsaxlokk.
Iżda, bla dubju, l-aqwa partita hija dik bejn Floriana u Birkirkara, bil-Furjaniżi jimmiraw għal rebħa biex jilħqu lill-istess Karkariżi fiż-żona Ewropea.
Logħbiet interessanti u bilanċjati huma Hibernians kontra Mosta u Gudja United kontra Balzan filwaqt li Valletta jibdew bħala favoriti li jiksbu t-tliet punti kontra Sirens.
Floriana v Birkirkara – Wara d-diżappunt tal-FA Trophy meta sfaw eliminati minn Sta Lucia, issa Floriana jixħtu kollox biex jilħqu l-objettiv tagħhom li jikkwalifikaw għall-kompetizzjoni tal-UEFA Conference League u jimmiraw li jiksbu t-tielet rebħa konsekuttiva.
Huma jiltaqgħu kontra Birkirkara li wkoll għandhom l-istess għan meta fil- veritá fallew milli jkomplu jisfidaw għar-rebħ tat-titlu meta jidher ċar li l-Ispartans ħarbu bil-kampjonat.
Floriana se jkunu msaħħa bir-ritorn ta’ Zachary Cassar filwaqt li għal Birkirkara jirritorna Diego Pires Dell’Oca, it-tnejn minn sospensjoni.
Fl-ewwel round kienu Birkirkara li ħarġu rebbieħa bl-iskor ta’ 1-0.
Sta Lucia v Zebbug – Dan huwa konfront bejn żewġ timijiet li qed jiġġieldu kontra r-relegazzjoni. Filwaqt li l-Luċjani jinsabu fil-post ta’ qabel l-aħħar, iż-Żebbuġin jinsabu żewġ punti fuqhom.
Dawn tal-aħħar, flimkien ma’ Floriana, huma l-uniċi żewġ timijiet li sfaw eliminati mill-FA Trophy.
Aktar minn hekk huma ġejjin minn erba’ telfiet konsekuttivi u għaldaqstant ma jistgħux joħorġu b’idejhom vojta f’din il-partita diretta.
Rebħa tarahom jiftħu vantaġġ ta’ ħames punti fuq Sta Lucia iżda dawn tal-aħħar għandhom elementi tajbin biżżejjed li kapaċi jdawru r-riżultat favur tagħhom u joħorġu miż-żona l-ħamra għalkemm xorta waħda jkunu għadhom fil-periklu li jitilfu posthom mal-kbar.
Ir-Rangers għandhom lil Henrique Marcelino Motta sospiż filwaqt li St Lucia m’għandhomx problemi ta’ players neqsin.
Fl-ewwel round Zebbug kienu rebħu bl-iskor ta’ 2-0.
Hibernians v Mosta – Wara żewġ telfiet infila, xejn għajr minn rebħa ma tissodisfa l-kriterji ta’ Hibernians meta jiltaqgħu kontra Mosta.
Bis-sitt punti mitlufa, il-Pawlisti qatgħu kull kuntatt mal-leaders Hamrun u għaldaqstant issa jiffokaw post fl-Ewropa.
Min-naħa tagħhom, Mosta jinsabu punt biss taħt Hibernians hekk kif fl-aħħar ħames partita huma rreġistraw erba’ rebħiet.
Iżda huma għandhom lit- tliet players – Christ Ememe, Tyrone Farrugia u Zachary Brincat – sospiżi.
Min-naħa ta’ Hibernians, dawn għandhom lil Bjorn Kristensen sospiż iżda jirritorna Thaylor Aldama.
Fil-konfront dirett preċedenti, Hibernians kienu ħarġu rebbieħa 5-0.
Gudja U. v Balzan – Din hija partita bejn żewġ timijiet ta’ nofs il-klassifika li għandhom differenza ta’ punt.
Wara bidu tant tajjeb, il-Gudjani naqsu mir-rendiment tagħhom biex issa huma kemmxejn maqtugħin miż-żona Ewropea.
Għall-kuntrarju, Balzan irkupraw tajjeb biex inqatgħu min-naħa t’isfel tal- klassifika hekk kif huma kisbu tliet rebħiet mill-aħħar erba’ ħarġiet.
Iż-żewġ timijiet għandhom player sospiż – Neil Anthony Micallef għal Gudja u Nikola Braunovic għal Balzan.
Iżda filwaqt li Karl Micallef jirritorna għal Gudja, Ivan Bozovic u Matheus Nogureira De Sousa jirritornaw għall-Balzanin.
Gudja kienu għelbu lil Balzan bl-iskor ta’ 1-0.
Sirens v Valletta – Sirens jiffaċċjaw lil Valletta li fl-aħħar ħarġa tagħhom fallew żewġ punti meta ġew miżmuma minn Pietá Hotspurs bl-iskor ta’ 1-1 … u għaldaqstant jimmiraw biex jirritornaw għar-rebħ.
L-istess iridu jagħmlu l-Pawlini hekk kif ġejjin minn telfa ta’ 1-0 kontra Floriana.
Huma se jkunu msaħħa mir-ritorn ta’ Marcelo Perreira Muniz, Rei Tachikawa u Degran Jackson minn sospensjoni filwaqt li Enmy Pena Beltre jirritorna għall-Beltin.
Fl-ewwel round iż-żewġ timijiet spiċċaw fi draw ta’ 0-0.
Marsaxlokk v Gzira U. – Dan huwa konfront delikat għal Gzira United li se jilagħbu kontra team li fl-aħħar seba’ logħbiet kiseb biss tliet draws.
Peró, ix-Xlukkajri għandhom lil Christopher Uzeh Edafe u Daniel Agius sospiżi.
Fl-ewwel round iż-żewġ timijiet temmew fi draw ta’ 0-0.
Pietá H. v Hamrun S. – Hamrun Spartans jibdew favoriti li jieħdu t-tliet punti kontra Pietá Hotspurs iżda dawn tal-aħħar jimmiraw għal sorpriża bħal ma għamlu Zebbug li taw l-unika telfa lill-Ħamruniżi f’dan l-istaġun.
L-Ispartans għandhom lil Emerson Marcelina sospiż.
Fl-ewwel round, Hamrun kienu ħarġu rebbieħa bl-iskor ta’ 2-0.
PROGRAMM KOLLU
Illum
Centenary Stadium
8.30pm: Sta Lucia v Zebbug R.
Għada
Tony Bezzina Stadium
2.00 pm: Hibernians v Mosta
4.15 pm: Gudja U. v Balzan
National Stadium
3.00 pm: Floriana v Birkirkara
Il-Ħadd
Tony Bezzina Stadium
11.30 am: Sirens v Valletta
National Stadium
2.00 pm: Marsaxlokk v Gzira U.
4.15 pm: Pietá H. v Hamrun S.
