Illum u għada tintlagħab is-17-il ġurnata tal-BOV Kampjonat Premier, bl-aktar partita li tispikka tkun dik bejn ir-rivali eterni, Valletta u Floriana, biż-żewġ timijiet jiddiżappuntaw għall-aħħar hekk kif jinsabu kemmxejn ‘il bogħod biex jissiġillaw post f’xi kompetizzjoni Ewropea.
Il-leaders Hamrun Spartans jaffrontaw lil Sirens f’partita delikata wara r-rebħa mqanżħa ta’ 2-1 fuq Pietá Hotspurs.
Birkirkara jibdew favoriti li jirbħu t-tliet punti meta jiffaċċjaw lil Sta Lucia filwaqt li mill-partita bejn Gzira United u Hibernians se jiggwadanjaw l-Ispartans hekk kif qed igawdu vantaġġ ta’ 12-il punt.
Valletta v Floriana – Bla dubju, dan id-derby se jqanqal ir-rivalitá bejn Valletta u Floriana li jeħodna snin lura.
Peró, din id-darba teżisti possbbiltá kbira li ż-żewġ timijiet ma jtellgħux in-numru kbir ta’ partitarji tas-soltu minħabba li, fi staġun mill-aktar diżappuntanti, it-tnejn jinsabu fis-disa’ u fis-seba’ post rispettivament għalkemm il- Beltin lagħbu partita inqas.
Iż-żewġ timijiet mistennija jinżlu bl-aqwa formazzjoni possibbli fejn jirritorna Enmy Pena Beltre għal Valletta minn sospensjoni.
Min-naħa l-oħra, il-coach tal-Greens, Gianluca Atzori, irid jara kif se jirriorganizza lill-players tiegħu hekk kif ġejjin minn telfa ta’ 2-1 kontra Birkirkara meta għal siegħa sħiħa, dawn tal-aħħar lagħbu bi player inqas meta tkeċċa Kevin Tulimieri.
Huma jimmiraw li jagħmlu double fuq il-Lilywhites meta fl-ewwel round kienu ħarġu rebbieħa bl-iksor ta’ 1-0, b’goal ta’ Kemar Reid.
Gzira U. v Hibernians – Dan huwa konfront dirett bejn żewġ timijiet li qed jisfidaw għal post fil-kompetizzjonijiet Ewropej.
Barra minn hekk, ikun x’ikun l-ezitu ta’ din il-logħba, se jiggwandjaw il-Ħamruniżi … b’dak ta’ draw ikun l-aħjar wieħed.
Iżda xejn għajr minn rebħa ma tissodisfa l-kriterji taż-żewġ timijiet fit-tentattiv li jkomplu jsaħħu posthom fin-naħa ta’ fuq.
Hibernians jimmiraw li jpattu għad-diżappunt tal- ewwel round meta l-Maroons kienu ħarġu rebbieħa bl-iskor ta’ 2-1.
Il-Pawlisti jissaħħu bir- ritorn ta’ Bjorn Kristensen minn sospensjoni.
Għaldaqstant iż-żewġ coaches għandhom iċ-ċans li jutilizzaw l-aqwa esponenti.
Birkirkara v Sta Lucia– Il-partita bejn Birkirkara u Sta Lucia tiftaħ il-programm tas-17-il ġurnata fejn il-Karkariżi jibdew favoriti minħabba li bħal donnhom sabu l-forma. Huwa ġejjin minn rebħa ta’ 2-1 fuq Floriana wara li tkeċċielhom player kif ukoll kienu fi żvantaġġ ta’ 1-0.
Sta Lucia jinżlu b’moral għoli hekk kif ġejjin minn rebħa ta’ 2-1 fuq Zebbug Rangers.
Filwaqt li l-Karkariżi fl-ewwel round rebħu 4-0, huma għandhom lil Giacomo Nava u Kevin Tulimieri sospiż.
Mosta v Pietá H.– Din hija partita bejn żewġ timijiet li ġejjin minn telfa … Mosta kontra Hibernians (2-0) u Pietá Hotspurs (2-1) kontra Hamrun Spartans.
Rebħa hija mportanti għaż-żewġ timijiet. Filwaqt li Mosta jridu jkomplu jisfidaw għal post fl-Ewropa, il-Hotspurs huma fil-bżonn tal-punti għas-salvazzjoni.
Il-Mostin jilqgħu lura lit-tliet players, Christ Ememe, Tyrone Farrugia u Zachary Brincat minn sospensjoni.
Fl-ewwel round, Mosta kienu ħarġu rebbieħa bl-iskor ta’ 4-1.
Zebbug R. v Gudja U. – Din hija partita bejn żewġ timijiet li qed jitilfu l-pass għall-għanijiet tagħhom hekk kif ġejjin ukoll minn telfa – Zebbug Rangers kontra Sta Lucia (2-1) u Gudja United kontra Balzan (1-0).
Filwaqt li ż-Żebbuġin niżlu fiż-żona l-ħamra, il- Gudjani b’mod gradwali qed jaqtgħu l-kuntatt mat-timijiet ta’ fuq wara bidu tant inkoraġġanti.
U dan ifisser li tilfu l-opportunitá biex jidħlu fiż-żona Ewropea u jiktbu l-istorja.
Filwaqt li huma se jkunu bl-aqwa formazzjoni possibbli fejn se jirritorna wkoll Neil Micallef minn sospensjoni, ir-Rangers se jkollhom jgħaddu mingħajr is-servizzi tas-sospiżi, Wilker Rocha Santos u Almir de Jesus Maldonado.
Fl-ewwel round Gudja kienu ħarġu rebbieħa bl-iskor ta’ 2-1.
Balzan v Marsaxlokk – Balzan jimmiraw li jiksbu r-raba’ rebħa konsekuttiva kontra team li ġej minn erba’ telfiet infila.
Barra minn hekk, Marsaxlokk ilhom ma jirbħu għal dawn l-aħħar tmien ħarġiet li fihom kisbu biss tliet draws … u tliet punti.
Balzan se jkunu mingħajr is-sospiż Divan Duran Torres iżda jirritorna Nicola Braunovic minn sospensjoni filwaqt li Marsaxlokk se jkun msaħħa bir-ritorn ta’ Daniel Agius u Christopher Edafe Uzeh.
Fl-ewwel round, Balzan kienu rebħu 2-1.
Hamrun S. v Sirens – Hamrun Spartans mhux mistennija jfallu kontra Sirens biex ikomplu jersqu lejn ir-rebħ tat-titlu.
Peró, minkejja li ġejjin minn ħames rebħiet konsekuttivi, il-Ħamruniżi mhumiex qed jirbħu bi skors kbar għall-potenzjal li jippossjiedu.
Għalihom jirritorna Emerson Marcelina filwaqt li għal Sirens jirritornaw Marcelo Pereira Muniz, Rei Tachikawa u Degran Jackson minn sospensjoni.
PROGRAMM KOLLU
Illum
Tony Bezzina Stadium
2.00 pm: Birkirkara v Sta Lucia
4.15 pm: Mosta v Pietá H.
National Stadium
2.00 pm: Gzira U. v Hibernians
4.15 pm: Zebbug R. v Gudja U.
Għada
Centenary Stadium
11.00 am: Balzan v Marsaxlokk
National Stadium
3.00 pm: Valletta v Floriana
Tony Bezzina Stadium
3.00 pm: Hamrun S. v Sirens
