Bejn illum u għada tintlagħab il-25 ġurnata tal-Kampjonat Premier fejn l-attenzjoni prinċipali tkun mixħuta fuq dawk it-timijiet li qed jissieltu għat-tielet post – Balzan, Gzira United, Hibernians u Mosta.
Il-mistoqsija hija jekk hux Gzira United se jċedu din it-taqtiegħa meta kien hemm perjodu li dehru li setgħu jisfidaw liċ-champions Hamrun Spartans … u mbagħad kandidati denji li jtemmu fit-tieni post … biex issa it-tielet pożizzjoni hija waħda inċerta.
Barra minn hekk, it-timijiet li jinsabu fl-aħħar tliet postijiet – Zebbug Rangers, Sta Lucia u Pietá Hotspurs, għandhom logħbiet ferm diffiċli kontra Mosta, Hamrun Spartans u Birkirkara rispettivament, u għaldaqstant iċ-ċansijiet tagħhom li jiksbu l-punti huma limitati. Iżda fil-football kollox jista’ jseħħ.
Balzan v Gzira Utd – Dan huwa l-aħħar ċans għal Gzira United li jkomplu jittamaw għal post fil-UEFA Conference League meta kien hemm żmien li t-tieni post kien ċens perpetwu għalihom.
Dan huwa konfront li fih rebħa hija imperattiva hekk kif ġejjin minn erba’ telfiet konsekuttivi. Rebħa tħallihom jittamaw iżda riżultat ieħor ikun ifisser viċin l-eliminazzjoni miż-żona Ewropea.
Wara bidu inċert, Balzan qabdu konsistenza ta’ riżultati biex fil-mument opportun telgħu fit-tielet post tal-klassifika u meta fadal żewġ partiti għat-tmiem, huma biss jistgħu jitilfu din il-pożizzjoni.
Kull team għandu player sospiż – Ivan Bozovic għal Balzan u Nikolai Muscat għal Gzira.
Min-naħa l-oħra, Luke Tabone jirritorna għall-Maroons.
Fl-ewwel round il-Balzanin kienu ħarġu rebbieħa bl-iskor ta’ 1-0.
Marsaxlokk v Floriana – Din hija partita biex tiġi onorata l-fixture hekk kif fil-veritá hija mingħajr l-ebda interess minħabba li Floriana jinsabu fin-nofs tal-klassifika filwaqt li Marsaxlokk huwa salvi minkejja li jinsabu fin-naħa t’isfel.
Wara staġun ferm diżappuntanti, il-Greens jimmiraw li jtemmu fuq nota pożittiva minħabba li ilhom ma jitilfu għal dawn l-aħħar tliet logħbiet.
Min-naħa ta’ Marsaxlokk, l-għan tagħhom huwa li jirritornaw għar-rebħ wara żewġ telfiet infila.
Floriana għandhom lill- goalkeeper Duncan Formosa sospiż iżda jirritorna Emiliano Callegari minn sospensjoni filwaqt li Leando Agiurre jkun qed jiskonta t-tieni sospensjoni għal Marsaxlokk.
Fl-ewwel round iż-żewġ timijiet temmew fi draw ta’ 1-1.
Birkirkara v Pietá H.– Birkirkara jimmiraw li jkomplu għaddejjin bis-sensiela pożittiva, konxji mill-fatt li rebħa taċċertalhom it-tieni post li jfisser kwalifikazzjoni għall-UEFA Conference League.
Huma se jilagħbu kontra t-team li jinsab fil-qiegħ tal-klassifika, Pietá Hotspurs, li xejn għajr minn rebħa ma tissodisfa l-kriterji tagħhom minħabba li jinsabu f’xifer l-irdum tar- relegazzjoni.
Filwaqt li l-Istripes jilqgħu lura lil Alex Da Paixao Alves minn sospensjoni, il-Hotspurs se jkun msaħħa bir-ritorn ta’ Kian Leonardi, Daniel Zerafa u Ganiu Atanda Ogungbe, b’dan tal-aħħar jiskonta t-tielet sospensjoni.
Fl-ewwel round, Birkirkara ħarġu rebbieħa bl-iskor ta’ 5-1.
Gudja U. v Valletta – Din hija partita oħra ta’ formalitá minħabba li ż-żewġ timijiet ma għandhom l-ebda objettivi.
Iżda interessati huwa l-fatt li Gudja United se jkunu mingħajr il-coach Taljan, Andrea Agostinelli, li nħall mill-kuntratt biex imur imexxi lit-team ta’ Benevento, f’pajjiżu.
Kull team għandu player sospiż – Juan Bolanos Ramires (Gudja U.) u Bradley Kamdem Fewo (Valletta).
Iżda jirritornaw James Arthur u Johann Bezzina għall-Gudjani u Christian Gauci għall-Beltin.
Fl-ewwel round, Gudja għelbu lil Valletta 1-0.
Hibernians v Sirens – Hibernians iridu bilfors jegħlbu lil Sirens biex jibqgħu fit-taqtiegħ għat-tielet post.
Huma se jilagħbu kontra team li ġej minn tliet rebħiet u draw.
Iżda Sirens għadhom liż-żewġ players, Ivan Kolev u Sean Cipriott, sospiżi filwaqt li għal Hibernians jirritorna Thaylor Aldama.
Fl-ewwel round, Hibs rebħu bl-iskor ta’ 1-0.
Zebbug R. v Mosta – Din hija partita li ż-żewġ timijiet iridu jirbħu … Zebbug Rangers biex ma jiġux relegati u Mosta biex jibqgħu fl-isfida għal post fl-Ewropa.
Peró Mosta għandhom żewġ players sospiżi – Clayton Failla u Precious Linus Tenebe iżda jirritorna Gianluca Sciberras filwaqt li għaż-Żebbuġin jirritorna Yanis Tonna, it-tnejn minn sospensjoni.
Fl-ewwel round, Mosta għelbu lir-Rangers 2-0.
Sta Lucia v Hamrun S. – Sta Lucia, li jinsabu fil-periklu tar-relegazzjoni jiffaċċjaw lil Hamrun Spartans li ġew megħluba darba biss f’dan l-istaġun u li jinsabu f’burdata festiva hekk kif għadhom rebħu l-kampjonat.
Iżda timijiet se jinżlu bl-aqwa formazzjoni bil- pressjoni tinsab kollha fuq il-Luċjani minħabba li ma jistgħux ifallu.
Fl-ewwel round l-Ispartans rebħu bl-iskor ta’ 2-0.
