Meta llum u għada tintlagħab il-ħames ġurnata tal-BOV Kampjonat Premier, il-leaders Birkirkara u Hamrun Spartans għandhom partiti delikati meta jiffaċċjaw lil Valletta u lil Floriana rispettivament.
Hamrun S. v Floriana – Hamrun Spartans jaffrontaw lil Floriana hekk kif jimmiraw li jirreġistraw il-ħames rebħa konsekuttiva.
Peró din mhux se tkun partita faċli minħabba li l-moral tal-Greens huwa wieħed għoli meta ġejjin minn rebħa ta’ 1-0 fuq ir-rivali eterni Valletta.
Wara bidu kwiet, jidher li Floriana ġejjin f’tagħhom u jekk juru l-istess forma li biha lagħbu kontra Valletta, bla dubju, se jkunu fost l-isfidanti ewlenin għall-ewwel tliet postijiet.
Iż-żewġ timijiet mistennija jinżlu bl-aqwa formazzjoni possibbli meta m’għandhomx players neqsin għalkemm Floriana issospendew lil Emiliano Callegari. Huma se jagħtu wkoll id-debutt lill-akkwist il-ġdid, it-Taljan, Lorenzo Di Grazia.
Mosta v Sirens – Mosta jiltaqgħu ma’ Sirens li jfittxu li jiksbu l-ewwel rebħa tal-istaġun meta jinsabu fil-11-il post b’żewġ punti biss.
Kollox ma’ kollox, il-wirjiet ta’ Sirens kienu xi ftit diżappuntati … iżda min-naħa l-oħra wieħed irid jammetti li kellhom l-agħar bidu possibbli hekk kif iffaċċjaw lil Birkirkara (0-2), Floriana (2-2), Valletta (0-0) u Hamrun Spartans (0-2).
Min-naħa tagħhom, Mosta rkupraw mit-telfa ta’ 5-0 kontra Hibernians biex għelbu lil Pietá Hotspurs bl-iskor ta’ 4-1. Rebħa għall-Mostin tkompli tkabbar il-pressjoni fuq Sirens fin-naħa t’isfel tal-klassifika.
Iż-żewġ naħat m’għandhomx players sospiżi iżda Sirens jilqgħu lura lil Gary Camilleri minn sospensjoni.
Sta Lucia v Gudja U. – Sta Luċija jilagħbu kontra Gudja United li qed jitqiesu bħala sfidanti serji għal post mal-ewwel erbgħa.
Fil-ġurnata preċedenti huma għelbu lil Zebbug Rangers 2-1 biex telgħu temporanjament fil-quċċata tal- klassifika … l-ewwel darba fl-istorja tal-club.
L-aktar żewġ players li qed jispikkaw huma Vito Plut u Johann Bezzina li t-tnejn sabu x-xibka fi tliet logħbiet minn massimu ta’ erbgħa.
Min-naħa l-oħra, Sta Lucia jinsabu fil-qiegħ tal-klassifika mingħajr l-ebda punt u għaldaqstant il-pożizzjoni tagħhom hija waħda nkwetanti bl-objettiv tagħhom ikun li jevitaw ir-relegazzjoni.
Fl-aħħar ħarġa tagħhom huma sfaw megħluba minn Birkirkara bl-iskor kbir ta’ 4-0 u għaldaqstant iridu jagħrfu kif se jirrorganizzaw kontra l-Gudjani.
Iż-żewġ timijiet m’għandhomx players neqsin.
Zebbug R. v Marsaxlokk – Dan huwa konfront bejn żewġ timijiet li rebħu l-promozzjoni iżda Marsaxlokk għadhom ma rebħux logħba biex jinsabu fit-12-il post, b’punt wieħed biss.
Fl-aħħar ħarġa tagħhom huma kienu tant viċin meta fetħu l-iskor kontra Balzan bi ġmiel ta’ free-kick ta’ Adrian Ferraris. Iżda Balzan dawru telfa f’rebħa biex ix-Xlukkajri ħarġu b’idejhom vojta li fil-veritá kien jimmeritahom xi ħaġa aħjar.
Il-pressjoni hi wkoll fuq Zebbug Rangers li jfittxu t-tieni rebħa tal-istaġun biex jitbiegħdu aktar miż-żona tar-relegazzjoni.
Din hija partita li tista’ tmur kull naħa. Iż-żewġ naħat se jilagħbu l-aqwa elementi tagħhom.
Birkirkara v Valletta – Dan huwa konfront bejn rivali kbar tal-logħba domestika.
F’partita mill-aktar diffiċli, Birkirkara jiffaċċjaw lil Valletta li għadhom ġejjin minn telfa ta’ 1-0 kontra l-ġirien Floriana.
Aktar minn hekk, fil-partita ta’ qabel huma waqqgħu żewġ punti fid-draw ta’ 0-0 kontra Sirens.
Għaldaqstant kontra l-Istripes jridu jkunu fl-aqwa forma tagħhom u rebħa hija mperattiva.
Min-naħa l-oħra, Birkirkara jinsabu f’forma brillanti hekk kif minn erba’ partiti kisbu punti massimi. L-aħħar vittmi tagħhom kienu Sta Lucia hekk kif rebħulhom bl-iskor kbir ta’ 4-0.
Iż-żewġ timijiet se jinżlu bl-aqwa formazzjoni fejn Valletta jkollhom lura lil Brandon Paiber minn sospensjoni.
Gzira U. v Pietá H. – Gzira United jiltaqgħu kontra Pietá Hotspurs li jinsabu fil-qiegħ tal-klassifika biex b’hekk il-Maroons jibdew favoriti li joħorġu bit-tliet punti.
Il-Gżirjani jinżlu għal din il-partita b’moral għoli meta ġejjin minn rebħa ta’ 2-1 fuq iċ-champions Hibernians.
Min-naħa tal-Hotspurs xejn għajr minn rebħa ma tissodisfa l-kriterji tagħhom jekk iridu jinqalgħu mill-aħħar post. Telfa tkompli żżid il-pressjoni fuqhom li jistgħu jitilfu posthom wara sena.
Huma se jkollhom jgħaddu mingħajr is-servizzi ta’ Clinton Bangura minħabba li jinsab sospiż.
Balzan v Hibernians – Balzan jilagħbu kontra Hibernians li huma “feruti” mit-telfa ta’ 2-1 kontra Gzira United u għaldaqstant rebħa hija mperattiva biex iżommu l-kuntatt mat-timijiet ta’ fuq.
Fil-veritá, s’issa l-Pawlisti huma l-aktar team li ddiżappunta meta jinsabu erba’ punti biss fuq iż-żona tar-relegazzjoni meta suppost jinsabu fin-naħa ta’ fuq tal-klassifika.
Huma se jilagħbu kontra team li għandu moral għoli hekk kif kiseb tliet rebħiet minn erba’ logħbiet, bl-aħħar waħda tkun dik kontra Marsaxlokk fejn dawru telfa f’rebħa ta’ 2-1.
Iż-żewġ timijiet m’għandhom problemi ta’ players neqsin.
