Real Madrid ħadu skoss qawwi fit-tentattiv li jkomplu jisfidaw għar-rebħ tat-titlu meta marru għand Real Sociedad u ġew miżmuma fi draw ta’ mingħajr goals biex issa jinsabu ħames punt taħt il-leaders Barcelona li min-naħa tagħhom, nhar is-Sibt li għadda, għelbu lil Girona bl-iskor ta’ 1-0.
Kienet partita pjuttost medjokri fejn l-ebda team ma kien perikoluż għalkemm Vinicius Junior u Rodrygo resqu viċin li jiftħu l-iskor għall-Madrileni.
Mal-ħin, it-team immexxi minn Carlo Ancelotti deher frustrat li ma setax jinfed lid-difiża avversarja iżda din il-wirja kienet biss id-dell tal-forma solita.
